O‘zbekiston respublikasi adliya vazirligi toshkent davlat yuridik Universiteti Jinoyat-protsessual huquqi darslik

Nazorat tartibida protest bildirishga quyidagilar haqli:
1) Oʻzbekiston Respublikasi Oliy Sudining raisi, Oʻzbekiston Respublikasi Bosh prokurori – barcha instansiya sudlarining hukmlari va ajrim (qaror)lari ustidan;
2) Oʻzbekiston Respublikasi Oliy Sudi raisining oʻrinbosarlari, Oʻzbekiston Respublikasi Bosh prokurorining oʻrinbosarlari – Oʻzbekiston Respublikasi Oliy Sudi Rayosati qarorlaridan tashqari, barcha instansiya sudlarining hukm va ajrim (qaror)lari ustidan.
Koʻrsatilgan shaxslar tekshirish va nazorat tartibida protest bildirish haqidagi masalani hal etish uchun har qanday jinoyat ishini suddan talab qilib olishga haqlidir.
Shikoyatni oʻrganib chiqish natijalari boʻyicha Oʻzbekiston Respublikasi Oliy Sudining sudyasi oʻz ajrimi bilan quyidagi qarorlardan birini qabul qiladi:
1) sud qarorlarini nazorat tartibida qayta koʻrib chiqish uchun asoslar mavjud emasligi toʻgʻrisida;
2) shikoyatni ish bilan birga koʻrib chiqish uchun Oʻzbekiston Respublikasi Oliy Sudining jinoyat ishlari boʻyicha sudlov hay’atiga oʻtkazish toʻgʻrisida.
Sud hukm, ajrim (qaror)larini nazorat tartibida qayta koʻrib chiqishga yoʻl qoʻyiladigan muddat. Oʻzbekiston Respublikasi Jinoyat-protsessual kodeksining 513-moddasiga koʻra protestda ogʻirroq jinoyatga doir qonun moddalarini qoʻllash zarurligi, jazoni kuchaytirish yoki mahkumning ahvolini ogʻirlashtiradigan boshqa oʻzgarishlar nazarda tutilgan boʻlsa, sudning ayblov hukmini yoki ajrimi (qarori)ni, shuningdek sudning oqlov hukmini yoxud ishni tugatish toʻgʻrisidagi ajrim (qarori)ni nazorat tartibida qayta koʻrib chiqishga ular qonuniy kuchga kirgandan keyin bir yil mobaynidagina yoʻl qoʻyiladi.
Sudlanganning ahvolini har qanday tarzda yengillashtirishni nazarda tutuvchi nazorat tartibida protest keltirish biron bir muddat bilan chegaralanmagan. Shuni ham nazarda tutish kerakki, hukm, ajrim (qaror)lardagi aniq koʻrinib turgan arifmetik va imlo xatolarini tuzatish sudlanganning ahvolini ogʻirlashtiruvchi holat deb qaralmasligi kerak.