Ҳомиладорлик ва камқонлик

Анемия олди даври. Яққол клиник кўринишларсиз кечади. Биздаги кўрсаткичлар бўйича 61 % ҳомиладорларда учрайди. Булар ўзларини соғлом деб ҳисоблайдилар. Яширин темир танқислигини аниқлашда қондаги трансферрин миқдори ва трансферриннинг темир билан тўйиниш коэффицентини аниқлаш орқали аниқланади.Яширин темир танқислиги билан оғриган аёллар юқори хавф гуруҳига киритилган.
Анемия олди даври кўпинча кўп аборт қилинганларда, қон йўқотганларда, экстрагенитал патологияси борларда, тез-тез ва кўп туғувчиларда, лактацион даврда ҳомиладор бўлган аёлларда кўп учрайди. Бундай ҳомиладорлар тезда чарчаш, иштаҳанинг йўқолиши,таъм билиш бузилишидан шикоят қиладилар. Баъзан камқонликни эрта токсикоз билан адаштиришади.Даволанмаган анемия преэклампсияга олиб келиши мумкин. Бу беморларга профилактика чораларини қўллаш тавсия қилинган.Ўз вақтида берилган темир препаратлари, кобальт, витаминлар, глюкоза анемия олди даврининг олдини олади ва анемияга ўтиб кетмаслигини таъминлайди.
Алиментар анемия - 13% аёлларда диспептик ўзгаришлар натижасида (жиғилдон қайнаши, кекириш, кўнгил айниши),гўшт маҳсулотларини ейишдан бош тортиш, таъм билиш бузилиши, қусиш, яъни эрта токсикоз белгиларининг намоён бўлиши, гастроэнтероколитнинг зўрайиши натижасида келиб чиқади.Даволаш ва профилактика чоралари темир препаратлари ,витаминлар, микроэлементлар, глюкоза, оқсил моддалари, дезинтоксикацион ва десенсибилизацион моддаларни парентерал юбориш.
Постгеморрагик анемия -қон йўқотиш, бачадондан ташқари ҳомиладорлик, абортнинг бошланиши, елбўғоз, йўлдошнинг барвақт кўчиши, бачадоннинг ёрилиши натижасида келиб чиқади. Анемиянинг ўткир ёки секин кечиши организмдаги темир моддасининг заҳирасига, қон кетиш даражаси, муддати, такрорланишига боғлиқ. Текширилган ҳомиладорларнинг орасида анемиянинг бу тури 3% ни ташкил қилади.
Одатда бемор қонни кам-кам порциялаб йўқотганида ҳеч нарсадан шикоят қилмайди, лекин гематологик кўрсаткичлари пасайиб кетади. Анемияда ўткир қон йўқотиш тана массасининг 0,3-0,5 % ини ташкил қилса, геморрагик шокка олиб келади ва зудлик билан инфузион ва интенсив гемостаз терапия ўтказишни талаб қилади.