Олабўжи романдан катта хикоя

иҳота тошлар узилган жойдан бу ёққа бурилди-да, бироз пастлади. 
Кейин тўғри кулбага ўрлаб кела бошлади. 
Кабинадан бир киши сочи тўзғиган бошини чиқариб қарагач, 
Ултон мошинага пешвоз юрди: у йигит – Мунди эди. Уловни ҳайдаб 
келаётган ҳам – қандайдир таниш. 
– Ассалом, азизим! – Мунди пастга тушибоқ қучоғини очди. 
– Келинг, Мундивой, келинг, – деб Ултон уни бағрига олди. 
Мундининг бўйи паст, аммо чайир-бақувват. 
Шофер ҳам ерга тушди. У – туман радиосининг муҳаррири эди: 
маллагина, қитмиргина Собир деган йигит. 
– Яхшими, Ултон ака? – деб уям кўришди. Кейин тисланиб: – 
Омин! – деди. – Айтган-бойлаганингизни яхшиликка буюрсин!... Хў-ўп, 
тўй қуллуғ бўлсин? 
– Раҳмат, – деди Ултон. Сўнг: – мабодо шуни репортаж қилгани 
келмадингларми? – деб сўради-ю, буларга ортиқча беписандлик ила 
қараётгандек бўлди. – Кечирасизлар, – дея давом этди: – “Қуллуғ 

---

237 
бўлсин”ни кўп эшитдим-да. 
– Эшитасиз-да, эшитасиз! – нуқиб деди Мунди. – Йўғасам шу 
кулбада ётаверинг эди, худо деб... Худо кўрсатмасин, бир куни ўзингизга 
совчи келарди. 
Ултон яйраб кулди. 
– Рост-да, Собиржон, – деб бу “гап”ни яна бўрттира кетди Мунди. – 
Ахир, районда бош кўтариб юролмай қолдик-ку, азизим? Ким билан 
учрашмайин, сизни сўрайди. “Нимага у ёзувчи уйланмайди? Ўтиравериб 
эсдан чиқариб юборганми?” Худо урсин-а, гапим рост... 
– Худо урмасин, – деди Ултон ва ҳозир нима қилишни ўйлади: 
ҳужрага таклиф этса, ўтиришлари керак, демак, анави ёққа тушиб 
чиқиш лозим... 
Ултон боя у ёқдан хабар олган, “савобталаб” ўспиринлар ҳам 
кўпайиб қолган экан: уч-тўрттаси майдончадаги ғишт синиқларини бир