Низомий номидаги тошкент давлат педагогика университети ф. И.Ҳайдаров Н. С. Жўраев психология тарихи

18. ЛУРИЯ АЛЕКСАНДР РОМАНОВИЧ (1902-1977)

Рус психологи. 1902 йил 16 июлда Қозон шаҳрида врачлар оиласида дунёга келди. Психологиянинг турли жабҳаларидаги муаммолар билан шуҚулланган. Рус нейропсихологияси асосчиси. Психология ва медицина фанлари доктори, профессор, 500 дан ортиқ илмий ишлар муаллифи. Выготский билан бирга олий психик функциялар ривожланишининг маданий-тарихий концепциясини яратиш устида иш олиб борган ва натижада 1930 йилда Выготский билан бирга «Ҳулқ-атвор тарихидан лавҳалар» асарини ёзган. 1920 йилларда инсоннинг аффект ҳолатларини текшириш жараёнида аффектив комплексларни таҳлил қилишга мўлжалланган, боғланган мотор реакцияларининг психофизиологик методикасини яратган. Ўрта Осиёга кўплаб экспедициялар уюштирган ва қатнашган. Бу экспедицияларда тўпланган материал асосида одам психикасидаги маданиятлараро фарқларни умумлаштириб кўрсатган. Луриянинг психология фани тараққиётига қўшган ҳиссаси нейропсихологиянинг назарий асосларини ишлаб чиқиши бўлиб, бу унинг олий психик функцияларининг системали динамик локализацияси ва унинг мия жароҳатлангандаги бузилишлари ҳақидаги назариясида акс этилган. Лурия нутқ, идрок, диққат, тафаккур, ихтиёрий ҳаракатлар ва фаолият нейропсихологияси бўйича илмий ишлар олиб борган.

19. ВИЛЬГЕЛЬМ ВУНДТ (1832-1920)

Немис психологи, физиологи, файласуфи ва тилшуноси. 1832 йил 16 августда туғилди. Физиологик психология фанини онгни элементларга ажратиш ва улар ўртасидаги алоқани ўрганиш мақсадида лаборатория тажрибаси методини қўлловчи алоҳида фан қилиб қўллаш режасини илгари сурган. 1879 йилда Вундт Лейпциг Университетида дунёда биринчи экспериментал психология лабораториясига асос солди ва бу лаборатория шу соҳадаги текширишларнинг халқаро марказига айланди. Бу ерда сезги, ассоциация, диққат турли қўзғатувчиларга реакцияларнинг пайдо бўлиш вақти ўрганилган. Вундт олий психик жараёнларни текширишга ҳаракат қилди, лекин унинг фикрича бу ишлар бошқа методлар ёрдамида амалга оширилиши лозим, бу фикрлар унинг «Халқлар психологияси» асарида акс эттирилган (1900-1920).
Вундт дунё психологиясининг қад кўтаришига катта ҳисса қўшган. Унинг қўлида кейинчалик машҳур психологларга айланган Э.Титчэнер, Ф.Крюгер, Г.Мюнстерберг, Ст.Холл, В.М.Бехтерев, Н.Н.Лангелар таълим олганлар.