Microsoft Word togaymurod otamdan qolgan dalalar lotin ziyouz com doc

www.ziyouz.com
kutubxonasi 
54
Men ko‘nglimni to‘qlab uyga keldim. 
Kechasi bir mahal momaqaldiroq gulduradi. 
Men tashqarilab qaradim. 
Qiblagohda sim-sim: yashin yondi. Ko‘ndalang yondi. Tikka yondi. 
Sharros-sharros yomg‘ir yog‘di. 
Men qo‘limga xitoyi fonarimni oldim. Yelkamga ketmonimni oldim. Jarariq yo‘l oldim. 
Jarariq to‘lib sel oqdi. Toshib-toshib oqdi. 
Men dala boshini qaradim. Etlarim bir uvishib oldi. 
Sel Jarariqdan toshdi. Sel dala ariqqa o‘tdi. Sel ariq qulog‘ini oldi. Sel dalalarim oralab oqdi. 
Men etiklarimni sug‘urdim. Cholvorimni lippa urdim. Sel oraladim. 
Shu tevarakda kesak bo‘ldimi, tosh bo‘ldimi — quloqqa olib kelib bosdim. Traktor temirlarini olib 
kelib bosdim. 
Sel barini yuvib-yuvib oqdi. 
Men ketmon bilan chim o‘yib-chim o‘yib bosdim — sel chimlarni-da yuvib oqdi. 
Tan-jonim ter bo‘ldi. O‘ngirim bilan bet artdim. Entikib nafas oldim, 
— Bor-e! — deya ketmonimni otib yubordim. Selga qarab o‘tirdim. Sel ostida qolajak dalalarim 
ko‘z oldimga keldi. 
Men ishtonchan bo‘ldim. Ko‘zimni chirt yumib selga oyoq soldim. 
Sel yaxday-yaxday bo‘ldi. 
Men quloqda tikka turib sel balogardon bo‘ldim. 
Sel belimga urdi. Sel ko‘kragimga urdi. 
Men quloch yoyib-yoyib sel balogardon bo‘ldim. 
Sel dala ariqqa deyarli o‘tmay qoldi. 
Sel yog‘och oqizib keldi — yog‘och ko‘kragimga tegib-tegmay o‘tdi. Sel shoxcha oqizib keldi — 
shoxcha ko‘kragimga tegib-tegib o‘tdi. 
Tan-jonim yaxladi. Suyaklarim qaqshadi. Tishlarim tik-tik etdi. 
Bir mahal tizzalarimga zilday bir nima kelib urildi. Zil nima tizzalarimdan oyoqlarim yuziga 
tushdi. Oyoqlarim yuzida oqmay qoldi. 
Oyoqlarim bir og‘ridi, bir og‘ridi! 
Baqirayin deya og‘iz ochdim — ovozim
chiqmadi. 
Oyoqlarim birovini qo‘yib birovini tortdim — zil nima ostidan tortib ololmadim. 
Oyoq panjalarim tanam uchun begona bo‘lib tuyuldi. Panjalarimni qimirlatdim — panjalarim-da 
qimirlamadi. 
Boshim aylandi. Ko‘nglim ozdi. Ko‘zim tindi...