Microsoft Word togaymurod otamdan qolgan dalalar lotin ziyouz com doc

 
18
Namozshomda raisimiz darvozasini olib turdim. 
Raisimiz keldi. Raisimiz bilan aroq hidi-da keldi. 
— Shefni jo‘kandim, — dedi raisimiz. — Klara Xodjaevnani jo‘natdim. Qani, bundaychikin 
turibsiz? 
— Oqtuproq dalani nima qilamiz, rais bova? — dedim. 
— Nima qilardingiz — eking, Shef aytdi — eking! 
— Ekkan bilan... 
— Bilaman! Lekin raykom sekretari og‘zidan chiqqan gap — qonun-da! 
— Mehnat qilgan kirasi emas-da? 
— Bilaman! Lekin raykom sekretari buyruq berdi-da! Ekmay ko‘ring — erta-indin raykomga 
ustimizdan yumaloq xat tushadi! 
Meni-da ayol zoti bino etdi. Bolxin terimchi onamiz aybimdan o‘tsin — ayol aralashmish ish 
rasvoi raddi balo bo‘ladi. 
Meni-da ayolim bor — u bir etak farzand tug‘ib berdi. Bir etak farzandlarim onasi bo‘lmish 
ayolimiz, men uchun qo‘li kosov ayolimiz, men uchun sochi supurgi ayolimiz aybimdan o‘tsin — ayol 
aralashmish ish ochiq mozor bo‘ladi. 
Meni-da qizlarim bor, qizlarim gunohimdan o‘tsinlar — ayol aralashmish siyosat yurt sho‘ri 
bo‘ladi, ayol aralashmish siyosat el sho‘ri bo‘ladi. 
 
19 
Sakkiz kun qaradim, to‘qqiz kun qaradim, o‘n kun qaradim — qani endi, oqtuproq dalamda chigit 
bo‘rtsa, qani endi oqtuproq dalamda chigit uch bersa. 
Oqtuproq dalam kal kalladay yaltirab tura berdi. 
Oxiri toqatim toq bo‘ldi — oqtuproq dalamni buzdim. 
Oqtuproq dalamni suvladim. Oqtuproq dalamni tobladim. 
Qayta ekdim. 
 
20
Shu-shu — vakila ayol bir oyog‘i dalalarimda bo‘ldi. 
— O‘zi, shu poshikastani kasbi nima? — dedim. 
— Ideologiya! — dedi raisimiz. 
Shundan buyon rahmatlik maktab direktorimizni qizini Ideologiya degich bo‘ldim. 
 
21
Tog‘ cho‘qqilari uzra ko‘mir-ko‘mir bulut toshdi. 
Dalalarim boshida ko‘mir bulut tugul oppoq bulut-da bo‘lmadi. 

---

Tog‘ay Murod. Otamdan qolgan dalalar (roman)