Марказий банк Аппарати (Бош нозир)

10 Марказий банкнинг пул белгиларини чиқаришдаги ваколатлари нимадан иборат?
Марказий банк Ўзбекистон Республикаси ҳудудида қонуний тўлов воситаси сифатида банкнотлар ва тангалар кўринишидаги пул белгиларини муомалага чиқаришда мутлақ ҳуқуққа эга. Уларни қалбакилаштириш ва ноқонуний тарзда тайёрлаш қонун ҳужжатларига мувофиқ жавобгарликка сабаб бўлади.
Муомалада бўлган банкнотлар ва тангалар Марказий банкнинг қатъий мажбуриятлари ҳисобланади ва унинг жамики активлари билан таъминланади.
11 Марказий банк банкнотлар ва тангалар намунасини ва дизайнини қайси орган билан келишилган ҳолда тасдиқлайди?
Марказий банк банкнотлар ва тангаларнинг намуналарини, шунингдек уларнинг дизайнини Олий Мажлис Сенатининг Кенгаши билан келишган ҳолда тасдиқлайди.
12 Пул билетларини муомаладан қайтариб олиш тартиби.
Ўзбекистон Республикасининг «Ўзбекистон Республикасининг Марказий банки тўғрисида»ги Қонуннинг 33-моддасига асосан, «Марказий банк Ўзбекистон Республикаси ҳудудида қонуний тўлов воситаси сифатида банкнот ва тангалар кўринишидаги пул белгиларини муомалага чиқаришда мутлоқ ҳуқуқга эга». Ушбу қонуннинг 38-моддасига мувофиқ, «Нақд пулларни муомалага чиқариш ва қайтариб олиш фақат Марказий банк амалга оширади».
Мазкур қонунга мувофиқ, Марказий банк янги намунадаги банкнот ва тангаларни муомалага чиқаришдан олдин, бу тўғрисидаги ахборотни, шунингдек уларнинг тавсифини оммавий ахборот воситаларида эълон қилади.
Ушбу қонуннинг 39-моддасига асосан, «Марказий банк Ўзбекистон Республикаси ҳудудида ҳар қандай банкнот ва тангаларни муомаладан қайтариб олишга ҳақли». Бунда, яъни, муомаладаги нақд пулларни қайтариб олиш ва ўрнига бошқа бир пул белгиларини муомалага киритишда, албатта Марказий банкнинг ушбу пул белгиларини ўзаро алмаштириш, айирбошлаш тартиби ва муддати кўрсатиб берилган меъёрий ҳужжати асос бўлиб хизмат қилади. Муомалада бўлган ва айирбошланиши учун муддати белгиланган банкнот ва тангалар, ўрнатилган муддат тугагандан кейин, тўлов воситаси сифатида ўз кучини йўқотади.