Марказий банк Аппарати (Бош нозир)

625-САВОЛ: Мижозларнинг юридик йиғмажилдида қандай ҳужжатлар сақланади?
ЖАВОБ: Ушбу йиғмажилдга имзо ҳуқуқи ўзгаргани тўғрисидаги ёзишмалар, ҳисобварақни тасарруф этиш ваколатини белгиловчи ҳужжатлар, ссуда ҳисобварақлари очиш тўғрисидаги мажбурият аризалари, шунингдек ҳисобварақлар очиш ҳақидаги фармойишларнинг нусхалари тикилади. Ҳар бир йиғмажилдга талаб қилиб олингунга қадар сақланадиган депозит ҳисобварағининг рақами қўйилади.
Ҳисобварақларни юридик расмийлаштириш билан боғлиқ ҳужжатларни сақлаш вазифаси бош бухгалтер ёки унинг ўринбосари зиммасига юклатилади. Ушбу йиғмажилдлар қулфланадиган жавонларда сақланиши лозим. Амалдаги имзо намуналари амалиёт бўлими ходимларининг қулфланадиган картотекаларида сақланиши лозим.
Ҳисобварақларни юридик расмийлаштириш билан боғлиқ ўз кучини йўқотган ҳужжатлар йиғмажилдда қолдирилади ва улар устига чизиқ тортилиб янги ҳужжатлар билан алмаштирилгани ёзиб қўйилади. Имзолар намуналари қўйилган карточка алмаштирилаётганда ўз кучини йўқотган карточкалар нусхаларидан бири мижознинг юридик йиғмажилдига тикилади, қолганлари эса йўқ қилинади. (АВ №1834, 11.07.2008й)
626-САВОЛ: Сўнгги назорат нимани англатади?
ЖАВОБ: Ушбу назорат жорий назоратнинг ажралмас қисми бўлиб, “Ўзбекистон Республикаси Марказий банки ҳудудий бош Бошқармаларининг ҳисоб-китоб касса Марказларида тўловларни амалга ошириш тартиби тўғрисида Низом” (МБ Бошқарувининг 26-А/3-сонли қарори, 622-сонли 26.11.2005й)да кўрсатилган.
Сўнгги назорат – ҲККМ сўнгги назорат бухгалтери Бэк-офиснинг масъул ижрочи бухгалтери томонидан амалиёт куни давомида киритилган тўлов ҳужжатларининг асл нусхаларидаги маълумотларини электрон нусха тўлов ҳужжатлари маълумотлари билан ўзаро таққослаш орқали такрорий текширишдир.