Марказий банк Аппарати (Бош нозир)

75 Марказий банкнинг ҳисобот даври ва ҳисобот бериш тартиби?
Марказий банкнинг ҳисобот даври 1 январь-31 декабрь қилиб белгиланган. Йиллик ҳисобот 15 майдан кечиктирилмай Олий Мажлис Сенати кўриб чиқиши учун тақдим этилади. (Марказий банк тўғрисидаги Қонун, 5-модда)
76 Молиявий ҳисобот қандай ҳисоботларни ўз ичига олади?
Молиявий ҳисобот бухгалтерия ҳисоби маълумотлари асосида тузилиб, қуйидагиларни ўз ичига олади:
- бухгалтерия баланси;
- молиявий натижалар тўғрисидаги ҳисобот;
- асосий воситалар ҳаракати тўғрисидаги ҳисобот;
- пул оқимлари тўғрисидаги ҳисобот;
- хусусий капитал тўғрисидаги ҳисобот;
- изоҳлар, ҳисоб-китоблар ва тушунтириш.
77 Асосий воситалар деганда нима тушунилади ва унга нималар киради?
Асосий воситалар - бу моддий активлар бўлиб:
а) банк фаолиятида банк хизматларини кўрсатиш жараёнида, ижарага бериш учун ёки маъмурий мақсадларда улардан фойланилади;
б) улар бир йилдан ортиқ вақт мобайнида фойдаланишга мўлжалланган бўлади.
Асосий воситаларга бино, иншоотлар, ускуна ва асбоблар, компьютерлар, мебель, ҳисоблаш техникалари, транспорт воситалари, фойдаланиш ҳуқуқи билан олинадиган ер, кутубхона фонди, қийматидан қатъий назар, сигнализация (огоҳлантириш) ва бинони қуришда унинг нархига киритилмаган телефонлаштириш объектлари ва шу кабилар киради.
78 Асосий воситаларнинг амортизацияси ва фойдали хизмат қилиш муддати қандай аниқланади?
Асосий воситаларга эскириш улар фойдаланишга топширилган ойдан кейинги ойдан бошлаб ҳисобланади. Асосий воситаларнинг амортизацияланадиган суммаси уларнинг фойдали хизмат қилиш муддати мобайнидаги ойлар бўйича мутаносиб равишда банк харажатларига ўтказиб борилади. Амортизация қуйидаги усулларни қўллаш йўли билан ҳисобланади:
1) бир текисда (тўғри чизиқли) ҳисоблаш усули;
2) бажарилган ишлар ҳажмига мутаносиб равишда эскиришни ҳисоблаш усули;
3) тезлаштирилган усуллар;
а) йиллар йиғиндиси усули (аккумулятив усул);
б) камаядиган қолдиқ усули.
Тегишли давр учун амортизация ажратмалари банкнинг харажатларига қуйидаги бухгалтерия ўтказмаси орқали ўтказилади:
Дт 566**-«Тегишли асосий воситаларнинг эскириш харажатлари»
Кт 165**-«Тегишли асосий воситаларнинг жамғарилган эскириш ҳисобварағи»
Асосий воситаларнинг фойдали хизмат қилиш муддати қуйидагича аниқланади:
а) мавжуд амортизация нормалари ёрдамида;
б) активнинг банкка келтириши тахмин қилинаётган фойдасини баҳолаш йўли билан.