Марказий банк Аппарати (Бош нозир)

611-САВОЛ: Ички аудитнинг мақсади нима?
ЖАВОБ: Банкда ички назорат ҳолатини, жумладан молия-хўжалик фаолияти самарадорлиги, ҳисобнинг ишончлилиги ва аниқлиги, ҳисоботларнинг тўлиқлиги ва объективлиги, Ўзбекистон Республикаси банк қонунчилиги ҳужжатларига, таъсис ва ички ҳужжатларга, банк операцияларини амалга ошириш қоидалари ва тартибларига риоя қилинишини текшириш (аудит) ва мониторингини амалга ошириш, шунингдек банк операцияларининг самарадорлиги ва ишончлилигини ошириш бўйича банк Кенгашига маслаҳатлар ва тавсиялар бериш. (АВ №992, 20.04.2004й)
612-САВОЛ: Ички аудит ходимларининг ваколатлари.
ЖАВОБ: Банк раҳбарияти ва ходимларидан банк фаолиятига боғлиқ бўлган барча зарур ҳужжатларни талаб қилиш, текширув жараёнида туғилган саволлар бўйича банк раҳбарлари ва ходимларидан (ёзма) тушунтиришлар олиш, зарур ҳужжатлардан нусхалар олиш, зарур бўлганда банкда белгиланган тартибда ҳужжатларнинг асл нусхаларини олиш, текшириш ўтказиш мақсадида банкнинг барча биноларига, шунингдек электрон ва қоғоз аривларига кириш, аудиторлик текшируви ўтказилгандан сўнг текшириш жараёнида аниқланган қоидабузарликларни бартараф этиш бўйича чора-тадбирларнинг бажарилишини назорат қилиш ваколатига эга. (АВ №992, 20.04.2004й)
613-САВОЛ: Аудиторлик фаолиятининг асосий принциплари?
ЖАВОБ: Аудиторлик фаолияти мустақиллик, холислик, эркинлик, профессионал малакалилик ва махфийлик принциплари асосида амалга оширилади.
614-САВОЛ: Пул ҳисоб-китоб ҳужжатлари бўйича бухгалтерия амалиётларини бажаришда ички назорат қандай тартибда амалга оширилади?
ЖАВОБ: Бухгалтерия операциялари дастлабки назорат (Фронт-офис ходимлари ёки масъул ижрочи томонидан), жорий назорат (Бэк-офис ходими ёки назоратчи бухгалтер томонидан) ҳамда якуний назорат (якуний назорат хизмати томонидан)дан ўтказилади.
Ушбу ички назоратни тўғри ва самарали амалга оширишни таъминлаш бўйича жавобгарлик банк раҳбарияти ва ички аудит хизматига юклатилади. (АВ №1834, 11.07.2008й)