Марказий банк Аппарати (Бош нозир)

618-САВОЛ: Товар моддий қийматликлар учун берилган ишончномалар қандай тартибда рўйхатга олинади?
ЖАВОБ: Ишончномани бериш "Берилган ишончномаларни ҳисобга олиш дафтари"да рўйхатга олинади.
Берилган ишончномаларни ҳисобга олиш дафтари саҳифалари рақамланади ва ип ўтказиб тикилади. Дафтарнинг муқовасида ўтказилган иплар учи устидан алоҳида қоғозда банкнинг раҳбари ва бош бухгалтери томонидан "Мазкур дафтарда ... варақ рақамланди" деган ёзув қайд этилади, елимланади ва муҳр билан тасдиқланади. Варақлар сони ёзув билан кўрсатилади.
Берилган ишончномаларни ҳисобга олиш дафтари ишончномаларни рўйхатдан ўтказиш учун масъул бўлган шахсда сақланиши лозим. (АВ №1834, 11.07.2008й)
619-САВОЛ: Моддий қимматликларни инвентаризацияси натижасида аниқланган ортиқча ёки камомад қандай тартибда акс эттирилади?
ЖАВОБ: Банкда ўтказилган инвентаризация натижасида аниқланган ортиқча моддий қимматликлар банк даромади ҳисобланади.
Банк ходимларининг айби билан фойдаланишга яроқсиз ҳолга келган моддий қимматликлар ёки камомад аниқланган ҳолда, ушбу моддий қимматликларнинг ҳақиқий қиймати, қонунчиликда белгиланган тартибда айбдор шахслардан ундириб олинади. Етказилган зарар миқдорини, банк мулкига зарар етказганлиги учун ташкилот ходими моддий жавобгарлиги доираси ва тартибини аниқлаш Ўзбекистон Республикаси Меҳнат кодекси билан тартибга солинади. (АВ №1834, 11.07.2008й)
620-САВОЛ: Омбордан моддий қимматликларни бериш қандай тартибда амалга оширилади?
ЖАВОБ: Моддий қимматликлар омборхонадан ёзма талабномалар бўйича берилади. Бу талабномаларни имзолаш ва омбордан материаллар беришга рухсат этиш ҳуқуқи берилган шахслар тўғрисида буйруқ чиқарилиши керак. Буйруқ нусхаси мазкур шахслар имзоларининг намуналари билан бирга омбор мудирига (омборчига) ва бухгалтерияга, ҳисобварақ бўйича ҳисоб юритадиган ходимга топширилади.
Қиймати тегишли ҳисобварақларга киритилиши керак бўлган материаллар учун ёзилган талабномаларда банк буйруғи бўйича имзолаш ҳуқуқи берилган тасарруф этувчининг рухсат берувчи имзоси бўлиши лозим. (АВ №1834, 11.07.2008й)