Маймун чечаги

Дори препаратлари келтириб чиқарган иситма

Дори-дармонли иситма дори препаратларининг салбий таъсирларидан бири ҳисобланиб, 3-5% ҳолларда кузатилиши мумкин.

Кўпинча амфотеррицин, антигистаминлар, барбитуратлар, допегит, пенициллин, новокаинамид, хинидин, салицилатлар, сульфаниламидлар, азотиоприн, изониазид, йодидлар, нитрофуранлар, ПАСК, рифампицин, стрептокиназа, стрептомицинлар иситмани келтириб чиқарадилар.

Дори-дармонли иситмаларнинг бир неча турлари фарқланади.

1.Дори препаратларни организмга юбораётган ёки юбориб бўлиши билан кузатиладиган иситма (препаратларнинг пироген таъсири).

2.Дори препаратларнинг фармакологик таъсиридан кузатиладиган иситма. Масалан, бактериоцид таъсир қилувчи антибиотиклар юборилганда кўп миқдорда микроорганизмларни ўлдиради ва пироген моддаларни ажратади. Ўсма касалликларида химиотерапия ўтказилса эндоген пирогенлар ажратилади.

3.Терморегуляция жараёнининг бирон бир босқичига таъсирдан пайдо бўладиган иситма. Масалан, амфетамин, кокаинлар терморегуляциянинг периферик босқичига таъсир этади. Қалқонсимон без гормони иссиқлик ишлаб чиқаришига таъсир этади.

4.Наслий ферментатив дефект ҳисобига ҳам иситма кўтарилади. Масалан, айрим препаратлар глюкоза-6-фосфат дегидрогеназа ферменти етишмовчилиги касаллигининг манифестациясига сабабчи бўлади ва иситма кўтарилади.

5.Дори препаратларига сезувчанликнинг жуда юқори бўлиши ҳисобига иситма кўтарилади.

Бунинг асосида иммунологик механизм ётади. Терида тошмалар билан кечиши дори препаратларига аллергик реакциядан далолат беради.

Генезлари ўхшаш бўлганлиги сабабли дори препаратлари ҳисобига келиб чиқадиган иситмани бошқа генезли иситмалардан фарқлаш қийин.

Дори препарати ҳисобига кузатилган иситма ремиттирловчи, интермиттирловчи, тўлқинсимон, субфебрил ҳарактерда бўлиши мумкин.

Дори препаратини истеъмол қилиш тўхтатилганда иситма йўқолади. Қайта истеъмол қилинганда эса иситма рецидив беради. Бундай ҳолатларнинг диагностикада аҳамияти катта.