М а р к е т и н г асосий маркетинг тушунчалари ва замонавий сўзларининг қисқача изоҳли луғати

Умумий (умумийлик). Аудит фақатгина, айрим жиддий томонларни (ҳолатларни) таҳлил қилиш билан чекланиб қолмай, балки маркетинг фаолиятини барча томонларини қамраб олади.
Тизимли. Маркетинг аудити корхонанинг ташқи маркетинг муҳитини, унинг маркетинги ички тизимини ва алоҳида маркетинг функцияларини қамраб олган, кетма-кет диагностик қадамларни ўз ичига олган муайян, қатъий режа асосида амалга оширилади.
Мустақил. Маркетинг аудитини мустақилликни ўсиб бориши нуқтаи назари бўйича қуйидаги олтита усулда амалга оширишни кўрсатиш мумкин: ўз аудити, чорраҳали (перекрестный) аудит, юқори ташкилот аудити, махсус аудиторлик ташкилоти аудити, махсус ташкил этилган гуруҳ аудити ва ташқи аудит.
Даврли равишда (даврийлик). Маркетинг аудити корхонада маълум бир муаммони (масалан, унинг маҳсулоти сотув ҳажми пасайган вақтда) юзага келган вақтида эмас, балки маълум бир давр оралиғида ўтказилиши лозим (ярим йилда, бир йилда ва ҳоказолар бир маротаба).
Маркетинг аудитининг якуний натижалари, икки қисмдан иборат бўлган резюме кўринишида тақдим этилиши мумкин: корхона фаолиятининг кучли ва кучсиз томонлари (ички аудит); корхонанинг имкониятлари ва хавф-хатарлари (ташқи аудит). Хорижий адабиётларда буни SWOT таҳлил дейилади.
Аудиторлар таҳлил натижаларини тайёрлайдилар ва тавсиялар берадилар. Корхонанинг бошқарув ходимлари эса, таҳлил натижалари асосида, корхонанинг маркетинг фаолиятини янги концепциясини ишлаб чиқадилар.
Маркетинг режаси (marketing plan) – бу корхона ўзининг қўйилган бозор мақсадларига маркетинг воситаларидан қандай фойдаланган ҳолда эришиш бўйича саволларга бағишланган ва ҳар йили ишлаб чиқиладиган тўла-тўкис (мукаммал) ҳужжатдир. Маркетинг режаси асосан маркетинг аудити натижаларини ҳисобга олган ҳолда ва маркетинг комплексининг (4P) барча асосий йўналишлари бўйича тузилади. Маркетинг режаси корхона раҳбарияти томонидан тасдиқланади ва у корхонанинг барча бўлимлари томонидан бажарилиши шарт ҳисобланади.
Маркетинг тадқиқоти (marketing research) – бу товарлар ва хизматлар маркетингига боғлиқ бўлган ахборотларни доимо йиғиш, акс эттириш ва таҳлил қилишдан иборатдир.