М а р к е т и н г асосий маркетинг тушунчалари ва замонавий сўзларининг қисқача изоҳли луғати

Маркетингнинг иқтисодий муҳити (marketing economic environment) – бу истеъмолчиларни харид қобилияти ва истеъмол тузилишига таъсир этувчи омиллар жамланмасидир. Улар қуйидаги кўрсаткичлар билан ўлчанади: истеъмолчи гуруҳлари бўйича даромадларни тақсимланиш даражаси, нархлар ва жамғармалар даражаси, қарздорликни мавжудлиги, кредитни олишни енгиллиги, сотувлар ва истеъмолни ҳажми ҳамда таркиби ва бошқалар.
Маркетинг самарадорлиги (efficiency of marketing) – бу корхона маркетинг фаолиятининг барча маркетинг комплексини таърифловчи кўрсаткичлар билан характерланади, яъни товар-ассортимент самарадорлиги, нарх, сотув (тақсимот) ва силжитиш стратегиялари кўрсаткичлари. Натижада маркетинг самарадорлигини умумий баҳоси шаклланади.
Маркетинг комплекси (complex of marketing) – корхона улар ёрдамида мақсадли бозор ҳақида хоҳлаётган маълумотларини оладиган тактик маркетинг воситалари (товар, нарх, тақсимот ва силжитиш) тўпламидир.
Марка (brand) – бу сотувчи ёки бир гуруҳ сотувчилар маҳсулотларини рақобатчилари маҳсулотларидан идентифика-циялаш ҳамда дифференциациялаш учун қўлланиладиган ном, атама, белги, символ, расм ёки уларнинг биргаликдаги комбинацияси. Марка ўз ичига марка номи, марка белгиси ва товар белгисини олиши мумкин. Истеъмолчилар кўпинча ўзларининг айрим маҳсулотлар ҳақидаги фикрлари асосида айнан шу корхона маҳсулотлари маркаси имиджини вужудга келтирадилар.
Марка номи (brand name) – бу сўз билан айтилиши мумкин бўлган, ҳарф, сўз ёки уларнинг бирга қўшилган жамланмаси кўринишидаги марканинг қисми (бўлаги)дир.
Марка белгиси (brand mark) – бу сўз билан айтиб бўлмайдиган, лекин таниб бўладиган, марканинг қисми (бўлаги)дир. Марка белгиси символ, расм, фарқ қилувчи ранг ёки шрифт (босма ҳарф) билан безатилиш кўринишида бўлади.
Маркетинг бюджети (marketing budget) – бу корхона маркетинг режасининг бўлаги бўлиб, у лойиҳалаштирилаётган даромадлар, харажатлар ва фойда миқдорини ўзида акс эттиради. Тасдиқланган маркетинг бюджети хомашё ва материалларни сотиб олиш, ишлаб чиқариш, меҳнат ресурсларини ҳамда маркетинг фаолиятини режалаштириш учун асос бўлади.