М а р к е т и н г асосий маркетинг тушунчалари ва замонавий сўзларининг қисқача изоҳли луғати

Маҳсулот дизайни (product design) - бу маҳсулотнинг ташқи кўринишида ва унинг функционал алоҳидалигида (бетакрорлигида) акс этган бўлиб, булар эса уни ўзига тортувчи (жозибадор), оддий, хавфсиз ва ишлаб чиқаришда, етказиб беришда, ишлатилишида ҳамда хизмат кўрсатишида тежамкорликка олиб келади.
Маҳсулот (товар)нинг ҳаётий даври (цикли) (product life cycle) – бу маҳсулотнинг бозорда дастлабки пайдо бўлган вақтидан бошлаб, уни айнан шу бозорда сотилишининг бутунлай тўхташигача бўлган вақти киради. Маҳсулотнинг ҳаётий даври асосан қуйидаги тўрт поғоналардан (стадиялардан) иборатдир, яъни: татбиқ этиш, ўсиш, пишиш (вояга етиш) ҳамда пасайишдан. Маҳсулот ҳаётий даврининг турли поғоналарида, турли маркетинг стратегиялари қўлланилади.
Маҳсулот сифати (product quality) – бу маҳсулотни ўзининг функцияларини бажариш қобилияти бўлиб, у узоқ муддатда ишлатилиши, чидамлилиги, ишончлилиги, тежамкорлиги, хавфсизлиги, ишлатишда оддийлиги ва бошқа параметрлари билан характерланади. Маркетинг позицияси томонидан, маҳсулот сифати истеъмолчилар берган баҳо асосида ўлчаниши лозим.
Мақсадли бозор (target market) – бу корхона (фирма) томонидан ўзининг товарлари ва хизматларига асосий харидорлар сифатида танлаб олинган ҳамда талаб ва истеъмол хулқ-атворлари ўхшаш бўлган истеъмолчиларнинг маълум бир гуруҳидир. Мақсадли бозорни ажратиш, белгилаш корхонанинг маркетинг бошқарувининг асосий ва бирламчи вазифаларидан ҳисобланади.
Мақсадли бозорларни танлаш (selecting target markets) – бу корхонанинг энг қизиқарли бўлган ва у ерда рақобатчиларига нисбатан самарали фаолият олиб бориши мумкин бўлган, мақсадли бозорларини танлаш бўйича, унинг маркетинг фаолиятини йўналишларидан биридир. Мақсадли бозорларни танлаш жорий талабни аниқлаш, талабни прогнозлаш, бозорни сегментациялаш, мақсадли бозорни аниқлаш ва бозорни позициялашни тақазо этади.
Мақсадли маркетинг (target marketing) – бу бозордаги фаолият стратегияси бўлиб, унинг доирасида корхона бозорнинг ҳар бир сегменти учун махсус маҳсулотларни ишлаб чиқишга интилади. Масалан, “Кока-кола” компанияси диетик овқатланувчилар сегменти учун махсус ичимлик ишлаб чиқаради. Мақсадли маркетинг қуйидаги учта босқичларни амалга оширишни кўзлайди: бозор сегментацияси, мақсадли бозорни аниқлаш ва бозорни позициялаштириш.