Личинка хордалилар (Urochordata) ¸ки šобиšлилар (Tunicata) кенжа типи

Ilonsimon baliqlar (Anguilliformes) turkumi. Bu turkumga kiradigan baliqlarning gavdasi uzun ilonsimon bo`ladi. Ilonsimon baliqlarning qorin, ba`zan esa ko`krak suzgich qanotlari bo`lmasligi bilan xarakterlanadi. Orqa, dum va anal suzgich qanotlari bir-birlariga qo`shilib ketgan. Suzgich pufagi ichagi bilan bog’langan. Ilonsimon baliqlar turkumiga 350-400 taga yaqin tur kiradi. Ular, asosan tropik va subtropik dengizlarda tarqalgan. Umuman, ugorlar dengizlarda yashaydi, o`tkinchi turlari ham mavjud. Boltiq dengizi havzalarida daryo ugori (Anguilla anguilla) uchraydi. Bu baliqning biologiyasidagi qiziqarli tomoni shundaki, ikra tashlash uchun daryodan okean va dengizlarga o`tadi. Ular Atlantika okeaniga o`tib, suvning chuqur joylariga tuxum qo`yadi. Tuxumdan uch yildan keyin lichinka chiqadi va bu lichinkalar migratsiya qilib qaytadan daryoga keladi. Yosh ugorlarning migratsiya qilib daryoga kelib voyaga yetish davri 4 yilga to`g’ri keladi. Ilonsimon baliqlarning MDHda unchalik ov ahamiyati yo`q. Ularning uzunligi 10-40 sm dan 1-3 m gacha va og’irligi 60 kg gacha boradi.
Cho`rtansimonlar (Esociformes) turkumi. Cho`rtansimon baliqlar turku-mining turlari ko`p emas, ya’ni 10 ga yaqin turi bor. Ular yirtqichlik qilib hayot kechiradi. Cho`rtan baliqlarning tanasi cho`zinchoq bo`lib, boshi juda katta, tumshug’i cho`ziq va yassi. Og’zi katta, boshi tanasi uzunligining uchdan bir qismini tashkil etadi. Pastki jag’i oldinga turtib chiqqan. Jag’ida tishlari juda ko`p. Orqa, dum va dum osti suzgich qanotlari bir-biriga yaqin joylashgan bo`lib, ular o`ljasini sakrab ushlab olishga yordam beradi. Ichagi bilan suzgich pufagi qo`shilgan. O`zbekistonda chuchuk suvlarda uchraydi. Respublikamizning janubdagi daryolarida va ko`llarida oddiy cho`rtan baliq (Esox lucius) uchraydi. Oddiy cho`rtan Sirdaryo, Amudaryo va Orol dengizida ham yashaydi.
Cho`rtan baliqlar o`troq hayot kechiradi. Ularning eng sevimli yashash muhiti suv qirg’oqlaridagi o`t bosgan joylar hisoblanadi. Cho`rtan baliqlar 17 mingdan 215 mingtagacha uvildiriq tashlaydi. Erkak cho`rtan baliq 3 yoshda, urg’ochisi esa 4 yoshda jinsiy voyaga yetadi. Eng katta cho`rtanlarning uzunligi 1,5 m, og’irligi esa 35-37 kg gacha boradi. Cho`rtan baliqlarning ozig’i baqa, mayda qushlar va baliqlar hisoblanadi. Bu baliqlar ovqatga ishlatilgani bilan unchalik ov ahamiyatiga ega emas. Ba`zan baliqchilik xo`jaliklariga ziyon ham keltirishi mumkin.