Klinik dietologiya va nutrisiologiya

Qorin  bo‘shlig‘i.  Ovqat  hazm  qilish  tizimi  odam  organizmidagi  eng  katta 
bo‘shliq bo‘lgan qorin bo‘shlig‘ida joylashgan. Qorin bo‘shlig‘i ko‘krak qafasi bilan 
o‘zi  davom  etuvchi  kichik  chanoq  bo‘shlig‘ining  orasida  joylashgan.  Qorin 
bo‘shlig‘i  ko‘krak  qafasidan  diafragma  bilan  chegaralangan,  diafragma  qorin 
bo‘shlig‘ining  yuqori  chegarasi  hisoblanadi.  Old  va  yon  tomonlardan  qorin 
bo‘shlig‘i  qorin  mushaklari  bilan  chegaralangan,  orqa  tomondan  esa  qorin 
bo‘shlig‘ini  ko‘p  sonli  tuzilmalar:  umurtqa  pog‘onasining  bel  bo‘limi,  belning 
kvadrat muskullari, bel-yonbosh muskullari bilan chegaralangan. Qorin bo‘shlig‘ida 
ovqat hazm qilish sistemasi organlaridan tashqari siydik ayirish sistemasi organlari 
va  ichki  jinsiy  organlar  joylashgan.  Qorin  bo‘shlig‘i  ichkaridan  fassiya  bilan 
qoplangan  bo‘lib,  uning  sohalari  qoplab  turgan  muskullariga  qarab  nomlangan. 
Qorin  bo‘shlig‘ining  orqa  devorida  qorin  pardadan  tashqari  bo‘shliq  bo‘lib,  u 
kletchatka va o‘zida joylashgan organlar bilan to‘lgan. Bu bo‘shliq fassiya va qorin 
parda orasida joylashgan. Qorin parda seroz parda bo‘lib, u qorin bo‘shlig‘i va unda 
joylashgan organlarni qoplaydi. Qorin parda ikki qavatga bo‘linadi: parietal qorin 
parda – qorin bo‘shlig‘i devorini qoplaydi, viseral qorin parda – qorin bo‘shlig‘idagi 
organlarni qoplaydi. Parietal va viseral qorin parda yuzasi katta maydonga ega – 1,7 
m2.  Qorin  bo‘shlig‘ida  oz  miqdorda  seroz  suyuqlik  bo‘lib,  u  qorin  bo‘shlig‘idagi 
a’zolarning engil sirpanishini ta’minlaydi. Qorin bo‘shlig‘i yopiq, lekin ayollarda u 
bachadon naylari, bachadon va qin bo‘shlig‘i orqali tashqi muhit bilan aloqaga ega.