Klinik dietologiya va nutrisiologiya

O‘t pufagi. O‘t pufagi yirik bo‘lmagan qopsimon organ hisoblanib, jigarning 
viseral  tomonidagi  shu  nomli  chuqurchada  yotadi,  unda  jigarda  ishlangan  o‘t 
suyuqligi  to‘planadi.  O‘t  pufagi  cho‘zinchoq  shaklga  ega,  uzunligi  12  sm  gacha, 
kengligi 4  sm  gacha,  hajmi 70  ml  gacha  bo‘ladi.  O‘t pufagida  uchta  asosiy  qism 
farqlanadi: o‘t pufagining tubi, tanasi va bo‘yni. O‘t pufagining tubi uning eng keng 
qismi  hisoblanadi.  O‘t  pufagining  bo‘yni  uning  ingichka  qismi  bo‘lib,  undan  o‘t 
yo‘li  boshlanadi.  Pufak  o‘t  yo‘li  3  sm  gacha  uzunlikka  va  3  mm  gacha  diametrga 
ega, u umumiy jigar yo‘li bilan qo‘shiladi. Umumiy jigar yo‘li o‘ng va chap jigar 
yo‘llarining qo‘shilishidan hosil bo‘ladi va uzunligi 10 sm gacha etadi. Pufak yo‘li 
va  umumiy  jigar  yo‘lining  qo‘shilishidan  umumiy  o‘t  yo‘li  hosil  bo‘ladi,  uning 
uzunligi ham 10 sm gacha etadi.