Kirisiw. O’siw h’a’m rauajlanıwdın’ ulıwma nızamlıqları. Реже: Adam organizminin’ bir pu’tinligi

Бас скелетиниң жасқа байланыслы өзгешеликлери
Жаңа туўылған балаларда дәслеп сүйеклениў орайлары бир-биринен, кең бириктириўши ткан пластинкалары менен ажыралған болады. Мий қақпағының әне усындай жумсақ жери еңбек делинеди. Жаңа туўылған баланың басында маңлай еңсе еңбеклери ҳәм қаптал жумсақлары болады. Маңлай еңбеги ромб түринде болып бойы 3,5 см, ени шама менен 2,5 см келеди. Бул еңбек баланың еки жасында сүйекленип жабылады. Еңсе еңбеги үш мүйешлик түринде болып, баланың еки айлығында сүйекленеди. Қаптал жумсақлары төртеў болып, бастың ҳәр бир қапталында бир жуптан жайласады. Қаптал жумсақлары баланың 2-3 айлығында сүйекленип питеди. 4-жаста гелле сүйеклеринде тигислер пайда болады. Гелле скелети баланың 3-4 жасында, 6-7 жасында ҳәм 11-15 жасқа шекем тез өседи. 13-14 жасынан баслап маңлай сүйеги тез өсе баслайды. Мектеп жасындағы балалардың гелле сүйеклериниң өлшеми әсте ақырын артып барады. Баланың ер жетиў дәўиринде, қызларда 12-14 жасында ул балаларда 13-14 жасында гелле сүйеклер тез өседи. Гелле скелети 20-30 жасқа шекем ҳәм өсип раўажланып барады.
Қадағалаў сораўлары
1. Скелеттиң атқаратуғын хызмети.
2. Скелетти пайда етиўши сүйеклер.
3. Сүйеклердиң классификациясы.
4. Сүйеклердиң органикалық ҳәм анорганикалық қурамы.
5. Сүйектиң тығыз ҳәм геўик заты.
6. Узын, келте ҳәм аралас сүйеклердиң дүзилиси.
7. Дене скелетине қайсы сүйеклер жатады.
8. Омыртқалардың дүзилиси ҳәм бир - биринен парқы.
9. Биринши ҳәм екинши мойын омыртқалары ҳәм олардың дүзилиси.
10. Қол скелети сүйеклериниң дүзилиси.
11. Аяқ скелети сүйеклериниң дүзилиси.
12. Бас скелетин қурайтуғын жуп ҳәм тақ сүйеклер.
13. Мий бөлими қайсы сүйеклерден қуралған.
14. Бастың жүз бөлимине қайсы сүйеклер жатады.
15. Еңсе, төбе, маңлай ҳәм шеке сүйеклериниң дүзилиси.
16. Тийкарғы ҳәм елек тәризли сүйеклердиң дүзилиси.
17. Жоқарғы ҳәм төменги жақ сүйеклери.
18. Жаңа туўылған балада гелле сүйеклериниң дүзилиси.
19. Үлкен ҳәм киши еңбеклердиң пайда болыўы.
20. Сүйеклердиң қәлиплесиўинде витаминлердиң ҳәм минерал дузлар дың әҳмийети.