Iii bob. Sug'urta kompaniyalari moliyaviy barqarorligini ta'minlash amaliyotini takomillashtirish yo'nalishlari

3.2-rasm. Sug'urta kompaniyalarining moliyaviy barqarorlikni ta'minlashda muhim ekanligining asosiy sabablari³
Sug'urta kompaniyalarining keng investisiya faoliyati moliyaviy aktivlarning narxlariga salbiy ta'sir ko'rsatishi mumkin bo'lsa-da, sug'urta kompaniyalari, odatda, uzoq muddatli investisiyalar qamroviga ega, chunki ular ko'p yillar davomida davom etadigan faoliyat uchun sug'urta mukofotlari olishadi. Shu sababli sug'urta kompaniyalari moliya bozorlarida narxlarni barqarorlashtirishga yordam berishlari mumkin, chunki ular moliyaviy aktivlar narxi pasayganda boshqa ko'plab investorlarga nisbatan investisiya faoliyatini tugatish ehtimoli kam hisoblanadi. Biroq, sug'urta kompaniyalari uchun ba'zi hollarda nazoratchilar tomonidan investisiya faoliyatlarida ma'lum bir cheklovlar qo'yiladi va faqat yuqori darajadagi aktivlarga egalik qilishga e'tibor qaratishlari mumkin. Sug'urta kompaniyalari tomonidan egalik qilinadigan qimmatli qog'ozlarning narxi pasayishi ularni narxi tushayotgan bozorlarda sotishga majbur qilishi va bu orqali zarar ko'rishlari mumkin.
3.1-jadval
2009-2018 yillarda xorijiy mamlakatlarda jami sug'urta
mukofotlarining ko'rsatkichlari (mln. AQSh dollari)⁴

№	Mamlakatlar	2009 yilda jami tushum	2018 yilda jami tushum	2009-2018 yillarda yillik o'rtacha ko'rsatkichi	Yillik o'rtacha o'sishi, foizda (2009-2018)
1.	Bahrayn	533	724	653	0.0447
2.	Indoneziya	8448	20383	14 311	0.1341
3.	Iordaniya	514	895	674	0.0825
4.	Malayziya	10 817	16634	13 747	0.0634
5.	Pokiston	1042	2636	1692	0.1418
6.	Turkiya	7830	10452	10 786	0.0421
7.	BAA	5456	12461	7820	0.1252

Xorijiy mamlakatlar tajribasini o'rganishda, avvalo, sug'urta sohasining asosiy ko'rsatkichlarini tahlil qilish maqsadga muvofiq hisoblanadi. Yuqoridagi jadvalga bir qator xorijiy mamlakatlarda tegishli yillarda sug'urta mukofotlarining umumiy miqdori, 2009-2018 yillarda yillik o'rtacha ko'rsatkichlari va yillik o'rtacha o'sishi tahlil qilingan (3.1-jadval).
Tahlil qilingan mamlakatlar orasida Malayziya, Indoneziya, Turkiya kabi mamlakatlarda sug'urta mukofotlari miqdori boshqa mamlakatlardagidan ko'ra sezilarli darajada ko'p ekanligiga guvoh bo'lishimiz mumkin. Shuningdek, BAA sug'urta bozori so'nggi o'n yillikda keskin o'sganligini ta'kidlashimiz lozim. 2009 yilda 5456 mln. AQSh dollaridan 2018 yilda 12461 mln. AQSh dollariga oshdi hamda tahlil qilingan mamlakatlar ichida eng yaxshilar qatoriga qo'shilgan.