Гормонал препаратлар (давоми) буйрак усти бези гормонларининг препаратлари

Минералокортикоидлар
Альдостерон ва 11-дезоксикортикостерон табиий минералокортикоид-лар ҳисобланади. Альдостерон электролитлар алмашинувига таъсири жиҳа-тидан 11-дезоксикортикостерондан 20-30 марта устун. Глюкокортикоидларга ўхшаб, альдостерон ҳам ҳужайра ичида жойлашган рецепторларга таъсир кўрсатади. Уларнинг асосий физиологик фаоллиги организмдаги туз-сув алмашинувига қаратилган. Минералокортикоидлар нефроннинг дистал қисмига таъсир қилиб, натрий ионларининг ва изоосмотик миқдордаги сувнинг қайта сўрилишини оширади. Бир вақтнинг ўзида калий ионларининг секрециясини кучайтиради. Улар углеводлар алмашинувига кам миқдорда таъсир кўрсата-ди, яллиғланишга ва аллергияга қарши фаолликларга эга эмас.
Дезоксикортикостерон ацетати (дезоксикортон ацетати) – альдосте- роннинг олиниши қийин бўлганлиги сабабли даволаш мақсадида қўлланилиб бошланган дастлабки препарат. Асосан м/о киритилади ва таблеткалари т/о тикиб қўйилади. Дезоксикортикостерон триметилацетати нисбатан давом- ли таъсирга эга. Фторгидрокортизон ацетати (флуокортизон, флоринеф) препарати минералокортикоид фаолликка эга бўлган восита сифатида кейин-ги йилларда кенг қўлланилмоқда. Мазкур препарат кучли яллиғланишга қар-ши фаолликка ҳам эга. Ичишга тавсия этилади.
Минералокортикоидлар асосан буйрак усти безининг сурункали етиш-
мовчиликларида (жумладан, Аддисон касаллигида) ишлатилади. Бундан таш-қари, улар мушаклар таранглигини ва иш қобилиятини оширувчи восита сифатида миастенияда ҳамда адинамияда ҳам ишлатилади.
Ножўя таъсирлари организмда ҳаддан ташқари катта миқдордаги натрий ионлари ва сувнинг йиғилиб қолиши билан боғлиқ: шишлар, тўқималар истисқоси ва асцит пайдо бўлади, АҚБ ошади. Оғир ҳолатларда чап қоринча етишмовчилиги ва ўпка шиши юзага келади.
Минералокортикоидларнинг ҳам антагонистлари яратилган. Уларнинг айримлари минералокортикоидларнинг синтезланишини бузади (метира-пон), аммо танлаб таъсир кўрсатмаганлиги сабабли глюкокортикоидларнинг ҳам синтезланишини сусайтиради. Шу билан бирга, минералокортикоидларнинг буйрак каналчаларидаги специфик рецепторларини танлаб блокловчи ва уларнинг самаралари юзага чиқишини бартараф этувчи антагонистлар ҳам мавжуд. Бундай воситаларга диуретик сифатида кенг қўлланиладиган спиронолактон препарати киради.