Гормонал препаратлар (давоми) буйрак усти бези гормонларининг препаратлари

АНАБОЛИК СТЕРОИДЛАР
Юқорида таъкидланганидай, андрогенлар анаболик фаолликка эга эканликлари туфайли оқсил синтезини кучайтиради. Бу скелет мушаклари, қатор паренхиматоз аъзолар, суяк тўқимаси вазнининг ортишига олиб келади. Бунда организмнинг умумий вазни ҳам ошади. Организмда азот, фосфор ва кальцийнинг ушланиб қолиши кузатилади. Эркаклар жинсий безларининг андроген хоссалари туфайли уларни анаболик восита сифатида ишлатиш мумкин эмас. Шунинг учун кучсиз андроген ва кучли анаболик фаолликка эга бўлган стероид тузилишли синтетик препаратлар яратилган. Уларнинг мазкур биологик самарасини ва кимёвий тузилишини эътиборга олган ҳолда улар анаболик стероидлар деб номланган.
Тиббиёт амалиётида қатор анаболик стероидлар ишлатилади. Давомли таъсирга ва юқори фаолликка эга бўлга препаратларга – фенаболин (нероболил, дуроболин, нандролон фенилпропионати) ва ретаболил (нандролон деканоати, декадураболин) киради. Фенаболиннинг таъсири 7-15 кун, ретаболилники – 3 ҳафта давом этади. Самараси аста-секинлик билан бошланади (феноболинники 1-2 кундан кейин, ретаболилники – 2-3 кундан кейин). Уларнинг мойли эритмалари м/о киритилади.
Метандростенолон (дианабол, неробол) қисқа таъсир кўрсатади. Уни кунига 1-2 маҳал таблетка шаклида ичишга буюрилади.
Бошқа анаболик стероидлар ҳам синтез қилинган бўлиб, уларга оксандролон, станозол, этилэстренол, силаболин препаратлари киради.
Калий тузларидан калий оротатининг ҳам анаболик хоссаси мавжуд.
Анаболик стероидлар таъсирида оқсиллар синтезланади, иштаҳа яхшиланади, тана вазни ошади. Остеопорозда суякларнинг кальцификацияси кучаяди. Регенератор жараёнларга ижобий таъсир кўрсатади.
Кўрсатма: кахексия, астения, глюкокотрикоидларнинг узоқ муддат давомида ишлатилиши, нур касаллигини даволаш, остеопороз, регенератор жараёнларни кучайтириш (суяклар синганда).
Ножўя таъсирлари: аёлларда камроқ даражадаги маскулинизация, кўн-гил айниши, шишлар, суяк тўқимасига кўп миқдорда кальцийнинг чўкиши, баъзан, жигар фаолиятининг бузилишлари.
Қарши кўрсатмалар: ҳомиладорлик ва эмизикли давр, простата бези хавфли ўсмаси, жигар касалликлари.