Глоссарий абсолют монархия

ТЕОКРАТИК ДАВЛАТ - давлат ҳокимиятини ташкил этишнинг махсус шакли, бунда ҳокимият черков иерархиясига тегишли бўлади. Ҳозирги кунда бунга, давлат-шаҳар Ватикан мисол бўла олади, у мутлақ теократик монархиядир. Ватиканда қонун чиқарувчи, ижро этувчи ва суд ҳокимияти кардиналлар ҳайъати умрбод сайлайдиган Папага тегишлидир.
УНИТАР ДАВЛАТ- бу ягона давлат бўлиб, унинг таркибий қисмлари маъмурий-ҳудудий бирликлар ҳисобланади ва уларда давлат суверенитетининг белгилари бўлмайди. Унитар тузилишга эга бўлган давлатнинг қуйидаги белгилари мавжуд: а) қонунчилик, ижроия ва суд ҳокимияти органларини ягона тизими мавжудлиги; б) ягона конституция, қонунчилик, солиқ, молия тизимларининг мавжудлиги; с) ягона фуқаролик жорий этилганлиги; д) барча ташқи муносабатлар марказий органлар томонидан амалга оширилади ва бошқалар.
ФЕДЕРАЦИЯ (франц. federation - бирлашма, иттифоқ) - ҳуқуқ назариясида давлат тузилиши шаклларидан бири. Бунда давлат федерация субъектларидан - давлатлар, автоном миллий - давлат (миллий - ҳудудий) бирликлардан ва ҳудудий (ҳудудий - давлат) тузилмаларидан таркиб топади. Ташкил топиш усулига кўра, федерация ўз таркибидаги субъектлар (давлатлар) ўртасида шартнома билан расмийлаштирилган иттифоқ тузиш ёки унитар давлатни федерацияга айлантириш орқали вужудга келиши мумкин. Давлатлар конфедерация тузишлари, кейинчалик у федератив давлатга айланиши ҳам мумкин. Аммо, бу шартнома ёки янги давлатнинг конституцияси билан расмийлаштирилиши лозим. Тегишинча, давлат назариясида ташкил топиш усулига қараб, шартномавий ва конституциявий федерация фарқланади. Шартномавий федерация шартнома тузиш орқали (Швейцария, Танзания Бирлашган Республикаси, Бирлашган Араб Амирликлари), конституциявий федерация эса - янги давлатнинг конституциясини қабул қилиш орқали (АҚШ, Канада, Бразилия) ташкил топган.
ФУҚАРОЛИК ЖАМИЯТИ - ҳар бир инсон манфаатини устувор билувчи, ҳуқуқий анъана ва қонунларга ҳурмат муҳити шакллантирилган, умуминсоний қадриятлар эъзозланадиган, инсон ҳуқуқлари ва эркинликлари сўзсиз таъминланадиган, давлат ҳокимиятининг самарали жамоатчилик назорати механизмлари вужудга келтирилган, инсоний муносабатлар чуқур маънавий-маданий қадриятларга таянадиган эркин демократик ҳуқуқий жамиятдир..