Глоссарий абсолют монархия

ИККИ ФУҚАРОЛИК - бипатридлар айни бир вақтда икки ва ундан ортиқ давлат фуқаролигига мансублик (икки фуқаролик).
Халкаро ҳуқуқда икки фуқаролик муносабати билан юзага келадиган масалалар буйича ягона, хамма тан олган тартиб белгиланмаган.Умуман, аксарият давлат икки фуқароликка салбий муносабатдадир.
ИМОМАТ - шиалар давлат ҳуқуқий концепциясига кўра давлат ва диний ҳокимиятни амалга оширишнинг тартиботи (институти) бўлиб, барча ҳокимият ваколатлари давлат ва жамиятдан устун қўйилган, ярим илоҳий ҳукмрон сифатлари берилган бенуқсон имом қўлида тўпланишини англатади. Масалан, 1979 йил Эрон Конституцияси фақиҳ (раҳбар)ни барча давлат органлари ва муассасалари ислом кўрсатмаларидан оғишмасликларининг кафолати деб билади. Хусусан, Конституциянинг 37-моддасида: “Эрон Ислом Республикасида давлат бошқаруви миллат йўлбошчиси ва доҳийси назорати остида фаолият кўрсатувчи, қонун чиқарувчи, ижро этувчи ва суд ҳокимияти органлари томонидан амалга оширилади”-деб белгилаб қўйилган.
ИМПИЧМЕНТ (ингл. impeachment) - қатор хорижий давлатларда давлатнинг юқори мансабдор шахслари масъулиятини амалга оширишнинг махсус тартиби. Иш импичмент тартибида кўриб чиқилганда парламентнинг қуйи палатаси айбловни шакллантиради ва тегишли мансабдор шахсга айб қўяди. Ишни кўриб чиқиш, аслида, парламентнинг юқори палатасида амалга оширилади, у ўзини суд ҳайъатига айлантиради. Юқори палата чиқарадиган ҳукм депутатларнинг аниқловчи кўпчилик овози (масалан, АҚШ сенатида овозларнинг ²/₃ қисми) билан қабул қилинади. Жазо лавозимдан четлатишдан нарига ўтмаслиги керак, аммо қоидага кўра, импичмент тартибида лавозимдан четлатилган шахс кейинчалик одатий судда суд қилиниши ва ўзи содир этган хатти-ҳаракатларга мувофиқ, жиноий жавобгарликка тортилиши мумкинлиги қайд қилиб ўтилади. Бошқарув республика шаклида бўлган айрим давлатларда импичмент, асосан, давлат бошлиғи - Президент хусусида у давлатга хиёнат қилган ёки конституцияга тажовуз қилганда назарда тутилади.
ИМПЛЕМЕНТАЦИЯ (ўзбек тилида “тадбиқ этиш”, “сингдириш” демакдир) - халкаро мажбуриятларнинг давлат ичкарисида амалга оширилиши, миллий қонунлар ва қонуности ҳужжатларнинг халқаро ҳуқуқий меъёрларга уйғунлашуви асосида амалга оширилиши.