Файзуллаев Саидкамол КЎнгил изҳори биринчи китобим ибтидо

Файзуллаев Саидкамол


КЎНГИЛ ИЗҲОРИ

Биринчи китобим


ИБТИДО
Мени чорламоқда ҳаёт йўллари,
Бахтиёр лаҳзалар очади қучоқ.
Илҳом йўл бошлайди шеърият сари,
Шу муштдек юрагим чўғ тўла ўчоқ.

Қалам мисраларга улашиб ҳаёт,

Сўнгра банди қилар оппоқ қоғозга.
Ижодим гулшани бўлади обод,
Дилдаги шеърларим тайёр парвозга.


ШЕЪРЛАРИМ
Шеърият гулхани ловуллар бунча,
Зарра учқун тушди қалбимга ундан.
Кўзга уйқу келмас ҳеч, тонг отгунча,
Олов пайдо бўлди ўша учқундан.

Тасбеҳ донасидек нафис тизилган,

Ҳар мисрам, ҳар сатрим, жамийки байтим.
Меҳр-муҳаббатим қўшиб ёзилган,
Қалбим тубидаги сўзларим айтдим.

Доимо асрайман дил ардоғида,

Мол-у давлатим ҳам, тахтим ҳам шеърим.
Бир сўз айтмоқчиман гап адоғида,
Менинг қувончим ҳам, бахтим ҳам ШЕЪРИМ.

ҚАЛАМ
Ёруғ дунёдаги вафоли ёрим –
Қоғоз билан қалам кетмас ёнимдан.
Сатрлар ювади кўнгил ғуборим,
Мисралар қуршаган ҳар томонимдан.

Илҳом парилари кўксимни чертиб,

Мени ғарқ қилади ишқ дарёсига.
Қалам юрак дардин елкага ортиб,
Қўлимдан етаклар шеър дунёсига...


ТАҚДИРИМИЗ
Тақдирда битгани бўлар дейди, рост,
Бизнинг тақдиримиз ёзилган азал.
Севги эртагимиз ўзимизга хос,
Севиб, севилмоқлик нақадар гўзал.

Тақдирда битгани бўлар дейди, рост,

Манглайимга сенинг исминг битилган.
Муҳаббатимизни этайлик эъзоз,
Висол онларига юрак интилган.

Тақдирда битгани бўлар дейдилар,

Ҳеч ким қилолмайди ахдимиз барбод.
Ҳар нарса бир кунни ўлар дейдилар,
Лекин бизнинг севги ўлмас умрбод.
ОҚ ОЛТИН ЎЛКАСИ
Оқ олтин ўлкаси гўзал бўстоним,
Номи қанча-қанча тилда достоним,
Томирларим аро қайнаган қоним,
Шижоат, ғайратим - Ўзбекистоним!

Кун сайин ортмоқда юртим ривожи,

Кўрсатди ҳар ненинг бордир иложи,
Бошига ярашган истиқлол тожи,
Шоним-у шавкатим - Ўзбекистоним!

Ҳар куни янгилик, дунё аҳли лол,

Келди тўлейида ёзилган иқбол,
Давом этаверсин мангу истиқлол,
Тинч-тотув давлатим - Ўзбекистоним!

Абадий ўчмайди эрк шамчироғи,

Саждагоҳ кабидир азиз тупроғи,
Буюк давлатларнинг энг буюкроғи,
Бебаҳо неъматим - Ўзбекистоним!

Қанча довон ошдик эркли бўлгунча,

Тинмай меҳнат қилдик кўркли бўлгунча,
Хизматингни қилай, юртим, ўлгунча,
Ердаги жаннатим - Ўзбекистоним!