Файзуллаев Саидкамол КЎнгил изҳори биринчи китобим ибтидо

МУҲАММАД ЮСУФНИ ХОТИРЛАБ
Яна баҳор келди, очилди гуллар,
Янги руҳ бағишлар ҳар тирик жонга.
Барчамизни бошлар бу нурли йўллар,
Устознинг нурафшон қабри томонга.
Ариқлар лабида ялпизлар титроқ,
Сизни соғинмоқда лолақизғалдоқ.

Фаҳр-у шараф ила сўзлар эдингиз,

Халққа борингизни этдингиз инъом.
Фақат яхшиликни кўзлар эдингиз,
Шу сабабдан қолди сиздан яхши ном.
Маъюс кўзларида ёши беадоқ,
Сизни соғинмоқда лолақизғалдоқ.

Алвон гиламларга тўлиб кетди ер,

Жами гул очилди сизни кўргани.
Лола ҳар инсондан сўраб бир сўз дер:
“Муҳаммадим қани, чин шоир қани?”.
Қабрингиз устида ҳилпирар байроқ,
Сизни соғинмоқда лолақизғалдоқ.
БОБУР МИРЗО НИДОСИ
Ватанимдан хабар беринг шамоллар,
Шум тақдир мени не куйларга солдинг?
Бошимда айланар турфа саволлар,
Жоним, Андижоним, қайларда қолдинг?

Булбул, бедананинг ширин сасини,

Қумсайман гулларнинг хушбўй исини,
Она табиатнинг ранггин тусини,
Жоним, Андижоним, қайларда қолдинг?

Ноз-у неъматларинг айт, таъми қайда?

Мендек мусофирнинг ҳамдами қайда?
Куйган юрагимнинг малҳами қайда?
Жоним, Андижоним, қайларда қолдинг?

Ёшликда орзулар бор эди бисёр,

Қандай бахтли эдим... Қандай бахтиёр...
Соғинч юрагимни тарк этмас зинҳор,
Жоним, Андижоним, қайларда қолдинг?

Қани қайтиш учун бўлсайди имкон,

Айрилиқ дардига топсайдим дармон,
То абад кўксимда яшайди армон
Жоним, Андижоним, қайларда қолдинг?
Сендан олисларда йироқда юрдим,
Етти ёт бегона тупроқда юрдим,
Мирзо Бобурингни унутма, юртим,
Жоним, Андижоним, қайларда қолдинг?


ОТА РОЗИ – ХУДО РОЗИ
Гулзор-у чаманлар эрур макони,
Дарахтда қуш ини бузилмасин ҳеч.
Бу дунёда ҳеч бир фарзанднинг жони,
Отасидан олдин узилмасин ҳеч.

Фарзандсиз отани ҳеч ким ҳеч қачон,

Ғамлар уммонидан қутқаролмайди.
Ҳаттоки энг жоҳил, энг ёмон инсон,
Фарзанд тобутини кўтаролмайди.

Дунё иши қизиқ, дунё бири кам,

Савоб-у гуноҳга у тарозидир.
Ота назаридан қолмагин ҳеч ҳам,
Зеро, Ота рози – Худо розидир.