Файзуллаев Саидкамол КЎнгил изҳори биринчи китобим ибтидо

СЕВГИЛИМ
Ишқинг бир лаҳзага қўймайди ҳоли,
Сенга қизиқ эмас ошиғинг холи,
Дил боғида унди севги ниҳоли,
Шу боғимга бўлгин боғбон, севгилим.

Гар келсанг бутунлай ғамлар арийди,

Йўқса шикаста дил кутиб қарийди,
Йўқласанг армоннинг шўри қурийди,
Учрашмоққа топгин имкон, севгилим.

Ишқим гулшанида очилган чечак,

Баҳордай чиройли, гўё келинчак,
Сен каби дилрабо топилмас бешак,
Кўзларим йўлингда ҳамон, севгилим.

Маҳзун ҳаётимга шодлик олиб кел,

Дардларинг унутиб, бахтга тўлиб кел,
Севги осмонига Зуҳро бўлиб кел,
Муҳаббатга тўлсин жаҳон, севгилим.


ЛАЙЛИ
Парисан-да сенга етишмоқ мушкул,
Ҳолим Мажнун каби телба, дайди-да.
Қолганларнинг ҳусни олдингда бир пул,
Лайлим, ҳеч ким сенга ўхшамайди-да.

Нилуфар юзингдан олган андоза,

Эй, сулув дилбарим, эй, қалби тоза,
Ўзгани севишга уриндим роса,
Лайлим, ҳеч ким сенга ўхшамайди-да.

Кўзларинг юракка ўйилган муҳр,

Сен томон чорлайди илоҳий сеҳр,
Кимни учратмайин бари бемеҳр,
Лайлим, ҳеч ким сенга ўхшамайди-да.

Ошиғинг кўргани келсайдинг бир бор,

Пинҳон муҳаббатим айлардим изҳор,
Юрагим севмайди ўзгани дилдор,
Лайлим, ҳеч ким сенга ўхшамайди-да.

Кузги ғунча каби сўлсам ҳам майли,

Ишқингда девона бўлсам ҳам майли,
Висолингга тўйиб ўлсам ҳам майли,
Лайлим, ҳеч ким сенга ўхшамайди-да.
КУТИШ
Қалбинг эшигини тақиллатсам гар,
Келмайди бир садо, келмайди бир сас.
Муҳаббат куйида қон бўлди жигар,
Ҳеч қайси бир ошиқ менчалик куймас.

Қалбинг эшигини тақиллатсам гар,

Парво қилмайсан ҳеч, бермай эътибор.
Бу нурсиз кунларим, айт, қачон тугар?
Нурафшон кунларга бошлагин , дилдор.

Қалбинг эшигини тақиллатсам гар,

Нега бир лаҳзага очмайсан , гулим?
Севги дарди мағрур бошимни эгар ,
Шунча вақт ўтса ҳам кутмоқда дилим.

Қалбинг эшигини очсанг қачондир,

Телба ошиғингни кўрмассан жонон.
Лекин муҳаббатим доим омондир,
Бўлмоққа розиман ишқингда қурбон.