Файзуллаев Саидкамол КЎнгил изҳори биринчи китобим ибтидо

СОҒИНДИМ, ОНАЖОН
Қоронғу...Ёлғизлик... Кўкда ой ярим,
Мазмунсиз ўтмоқда маъсум кунларим,
Зулматнинг тубига чўккан тунларим,
Соғиндим, онажон. Соғиндим она...

Ойдан рухсорингиз топа олмайман,

Бахтдан сармаст бўлиб чопа олмайман,
Ғамлар эшигини ёпа олмайман,
Соғиндим, онажон. Соғиндим она...

Бу ерлардан олис қочгим келади,

Юлдузлар ёнига учгим келади,
Бир бор бағрингиздан қучгим келади,
Соғиндим, онажон. Соғиндим она...

Хотиржамлик кетди узоқ-узоққа,

Илиндим ғам-қайғу қўйган тузоққа,
Кетай дейман, аммо кетай қаёққа,
Соғиндим, онажон. Соғиндим она...

Билмам, яна қанча оқар кўз ёшим?

Билмам, яна қанча етар бардошим?
Буюк хотирангиз бўлар сирдошим,
Соғиндим, онажон. Соғиндим она...
СОТҚИНЛАР
Ватанин сотганларнинг ҳоли ёмон, дейдилар,
Бундайларнинг жисмида бўлмас виждон, дейдилар.

Юртфуруш, хоинларнинг отаси-ю онаси

Ажалдад беш кун бурун топширар жон, дейдилар.

Балки бугун бахтлидир, балки бахтли эртага,

Аммо кун келиб бўлар рангги сомон, дейдилар.

Оқ сут берган халқининг лаънатига қолганлар,

Муқаррар жазолардан қолмас омон, дейдилар.

Қўлига қурол тутиб бегуноҳни отганни,

Инсон қиёфасига кирган шайтон, дейдилар.

Саид Камол бўл жасур, Ватанингни авайла,

Шунда сени ҳақиқий комил инсон, дейдилар.


МАКТУБ
Ҳаётимга ташриф буюрди зулмат,
Қоронғу умримга зиё ҳадя эт.
Қанча уринсам ҳам тинч қўймади дард,
Келиб дардларимга даво ҳадя эт.

Саболар элтади севги изҳорим,

Қайғулар ёнимда вафоли ёрим,
Эй, дилбар, ким ювар дилдан ғуборим?
Маъсум кунларимга маъно ҳадя эт.

Кел , санам , кўксимдан эрисин музлар,

Севгидан порласин кўкда юлдузлар,
Мени Фарҳод қилди сен айтган сўзлар,
Энди Ширин каби вафо ҳадя эт.

Маъюс қилма асло , кўзларим , гулим ,

Бари ҳақиқатдир сўзларим , гулим ,
Саодат қасрига бошла севгилим,
Муҳаббатга тўла дунё ҳадя эт.