Ёнfин хавфсизлиги

18. Ёнғин ўчириш автомобили ҳайдовчисининг хизмат мажбурияти /1/
Ёнғин ўчириш автомобили ҳайдовчиси экипаж командирига бўйсунади ва ўзига бириктирилган техниканинг, шунингдек унга ўрнатилган механизмларнинг доимо жанговар шай туришига ҳамда ёнғин ўчириш вақтида тўхтовсиз ишлаб туришига жавобгардир.
Ёнғин ўчириш автомобили ҳайдовчиси:
-ёнғин ўчириш автомобилларининг техник-тактик имкониятларини ва уларга техник хизмат кўрсатиш тартибини ҳамда ёнғин хавфсизлиги қисмининг чиқиш ҳудуди, у ердаги йўллар ва сув манбаларининг жойлашишини билиши;
-йўл ҳаракати хавфсизлиги қоидаларини бажариши, ёнғин хавфсизлиги қисмида мавжуд ҳамма ёнғин ўчириш автомобилларини (ҳайдовчилик гувоҳномасида рухсат этилганларни) бошқара олиши;
-бириктирилган автомобилнинг барча махсус агрегат ва механизмларида, шунингдек радиоалоқа воситаларида ишлай олиши, ёнғин ўчиришда уларнинг тактик-техник имкониятларидан тўла фойдалана олиши;
-хизматни ўташ вақтида, ёнғин ўчириш техникасини ишлатишда, ёнғин ўчириш автомобилларига техник хизмат кўрсатишда ҳамда таъмирлашда хавфсизлик техникаси қоидаларига риоя қилиши;
-бириктирилган автомобилларнинг техник ҳолатини текшириши, уларга техник хизмат кўрсатишни ўз вақтида сифатли бажариши;
-ёқилғи мойлаш ва бошқа материалларни тежамкорлик билан ишлатиши, уларни сақлаш қоидаларига ҳамда тартибига риоя қилиши;
-гаражда асбоб-ускуналардан фойдаланиш қоидаларига риоя қилиши, ёнғин ўчириш автомобилларини ишлатиш техник ҳужжатларини тўғри тўлдириб бориши;
-смена ички хизмати вазифаларини бажариши;
бириктирилган ёнғин ўчириш техникасидаги барча носозликлар ҳақида экипаж командирига ахборот бериши ва зудлик билан созлаш чораларини кўриши лозим.
Ҳайдовчилик гувоҳномаси ва ёнғин ўчириш автомобилини бошқариш ҳуқуқини берувчи махсус рухсатномаси ўзида бўлмаган ҳайдовчиларга навбатчиликка туришга рухсат берилмайди.
Ҳайдовчига ўзи бўйсунадиган шахсларга ва бошқаларга транспорт воситасини бошқариш учун бериш тақиқланади.