Электр энергияси поездларни тортиш учун қўлланган илк тажрибаларда энергия манбаи ва электр двигатель ҳаракатланувчи бирликда жойлашар эди

§ 10. СИМЛАРНИНГ КОНСТРУКЦИЯСИ ВА МАТЕРИАЛЛАРИ

Темир йўл, трамвай ва тролейбус йўлларида қўлланадиган контакт симлари шаклдор профилга (Ф) эга бўлиб, симни қисқич ёрдамида тутиб туриш учун иккита бўйлама ариқчаси бор. Мис - МФ ва бронза - БрФ контакт симлари ишлаб чиқарилади. Шаклдор профилли, кесими, масалан 100 мм² га тенг бўлган мис контакт симнинг шартли белгилари қуйидагича: МФ-100 сими.

Электрлашган темир йўлларда асосан мис МФ-100, МФ-150, МФ-85 каби контакт симлардан фойдаланилиб, шулардан МФ-85 сими станция йўлларида қўлланади. Мисга легирловчи элементлар (кадмий, магний ва б.) қўшиб тайёрланадиган бронза контакт симлари мис симга нисбатан узилишга вақтли қаршилиги кучлироқ ва электр токини камроқ ўтказади. Бу каби симлар секинроқ эскирганлиги сабабли, уларнинг хизмат муддати узаяди; улар фойдаланиш даврида қизиб кетишга чидамлироқ бўлади. Бронза симлар юқори юза қисмида ариқчаси борлиги билан ажралиб туради (26-расм). Мис ўрнига бошқа, у қадар камёб бўлмаган металлар қўллашга интилишлар натижасида намуна сифатида пўлат-мис, пўлат алюминий симлар пайдо бўлди. Аммо фойдаланиш ва монтаж жараёнидаги нуқсонлари туфайли бундай симлар темир йўлда кенг татбиқ этилмади.

Занжирли контакт османи тутиб турувчи трос сифатида кўп торли (27-расм): мис, биметалл ва пўлат симлар қўлланади. Сим материали унинг зарур кесим юзаси ва занжирли контакт осмаси конструкцияси, электрлашган линия жойлашган жойи ва бошқа кўплаб шароитларга боғлиқ. Кўп торли симлар бир марказий сим ва унинг атрофида спиралсимон жойлашган бир ёки икки қатор симлардан иборат бўлади. Симларнинг ҳар бир қатори аввалгисига нисбатан орқа тарафга айлантириб бажарилиб, бунда ташки қатор ўнг тарафга ўралади.
Мис сим юқори даражада электр ўтказувчанлиги, занглаш (коррозия) га чидамлилиги сабабли фойдаланишда қулай бўлиб, узоқ муддат хизмат қилади (3-жадвал). Мис троснинг камчилиги шундаки, унинг ҳарорати ўзгарганида биметалл ва пўлат тросларга нисбатан ярим компенсацияланган осма осилиш стреласи кўпроқ ўзгаради. Мис изоляцияланмаган, кўндаланг номинал кесими юзаси, масалан, 120 мм² га тенг бўлган симнинг шартли белгиси қуйидагича: М-120 сими.