Э. ҚОсимов, М. Aкбaров пaрдозбоп қурилиш aшёлaри

Пардозбоп қоришмалар бино деворларининг ташқи томонларини, ёки заводнинг ўзида панел ва блокларни сувашда ишлатилади. Рангли сувоқ деб аталувчи қоришма таркибида цемент, оҳак, туйилган мармар, ишқорга чидамли пигментлар, қўшилмалар ва қум бўлади. Кўпинча портландцемент ўрнида оқ рангли цемент ёки гидравлик цемент ҳам ишлатилади. Сувоқни ҳар хил рангда бўлиши учун рангли табиий тошларни туйиб боғловчи моддалар билан қоришма тайёрланади. Кейин ишлатилган цементнинг қуюқланишини охирига 2-3 соат қолганда сувоқ юзаси сув ёки счетка билан ювилади ва рангли тўлдиргичлар юзаси очилади. Рангли қум бўл­маса, ишқор ва сувга чидамли силикат бўёқларда оддий қумни бўяб ҳам ишлатилади.
Табиий тошни эслатувчи рангли қоришма қотгандан кейин, унинг мустаҳкамлиги катта бўлиши керак. Сиқилган ҳаво босимида ишловчи болғалар билан текис сувоқ юзасига урилади ва нотекис тасвир берилади.
Сунъий мармар тасвирини берувчи рангли сувоқ қоришмалари асосан гипс боғловчилар ва бўёқлар асосида тайёрланади. Рангли пигментлар қўшилган чала қориштирилган гипс бўтқаси ёки икки уч хил рангли гипс бўтқалари остки юзаси ойнали қолипга қуйилади. Кейин, ҳар хил рангли пардозбоп гипс тахтанинг юзаси елим сув-парафин билан силлиқланади. Сунъий мармар юзали гипс тахта олиш учун қолипнинг остки юзасига қўпол тўқилган бўз (мешковина) ёзилади ва унинг устига рангли қуруқ гипс аралаш­маси юпқа қатламда ётқизилади, кейин гипс бўтқаси қуйилади. Қолипдан олинган гипс тахтадаги бўз олинади, унинг юзаси текисланиб силлиқланади ва ялтиратилади.


Махсус қоришмалар


Aкустик қоришмалар гипсли ёки гидравлик боғловчиларни ғовак тўлдиргичлар (тошқол, керамзит ва ҳ.к.) билан қориштириб олинади.
Иссиқликни сақловчи қоришмалар тайёрлашда енгил минерал тўлдиргичлар (пемза, туф, керамзит, аглопорит ва ҳ.к.), ҳамда толали моддалар ва қўшилмалар ишлатилади. Иссиқликни сақловчи қоришмалар ичида майда тўлдиргич сифатида кўпчитилган перлит, цемент ёки гипсли таркибни ишлатиш катта самара беради. Шунингдек, қоришманинг пластиклигини ва ғоваклигини ошириш мақсадида ҳаво ютувчи қўшилмалардан ёғоч смоласи ва кўпиртирувчи ёғоч пеки ишлатилади.