Э. ҚОсимов, М. Aкбaров пaрдозбоп қурилиш aшёлaри

Уч қатламли тахта ойна. Синганда ҳам бўлакларга бўлин­майдиган, триплекс деб аталувчи уч қатламли ойна икки­та ялтироқ тахта ойнани ўзаро органик елим билан ёпиштириб тайёрланади. Бундай ойна автомашина ва самолёт дераза кўзларига солишда, юқори босимда ишловчи асбоб-ускуналар тайёрлашда кенг ишлатилади. Aгар уч қатламли ойнага зарб билан урилса, унда кўндаланг ёки тартибсиз дарзлар ҳосил бўлади, аммо икки қатлам орасидаги елим ойна синиқларини ушлаб, уни бўлакларга бўлиниб кетишдан сақлаб қолади.
Триплекс тахта ойна эни 125 дан 525 мм гача; узунлиги 250 дан 1200 мм гача ўлчамда ишлаб чиқарилади.
Ойна тахта орасида ҳаво қатлами бўлган пакет ойна қурилишда икки қават дераза ромлари ўрнида ишлатилади. Икки тахта ойна орасидаги ҳаво қатлами иссиқлик ўтказувчанликни камайтиради (5.3-расм).
Шиша буюмларнинг мустаҳкамлигини ошириш ва синган тақдирда бўлакларга сачрамаслигини таъминлаш учун пўлат сим тўр билан арматураланади. Бу хил ойна ёруғлик тушадиган фонарлар, ойна тўсиқларга, саноат бинолари деразалари, зина катаги тўсиқлари ва шу кабиларда фойдаланилади.
Шиша саноатида шакли ва ўлчамлари жиҳатидан асбест-цемент шиферларига ўхшаш томбоп тўлқинсимон тахта ойналар ишлаб чиқарилади. Унинг арматураланган хили ёруғлик тушиб турадиган ялтироқ сифатида том ёпишда ишлатилади.
Ўта мустаҳкам тахта ойнанинг эгилишга мустаҳкамлиги оддий ойналарникига нисбатан 5—8 марта катта бўлади. Қалинлиги 5 мм дан катта бўлган ўта мустаҳкам тахта ойнанинг зарбга қаршилигини синаш учун унинг сиртига 1200 мм баландликдан 800 г оғирликдаги пўлат шар эркин ҳолда ташланади. Бунда тахта ойнада дарз ёки синиш аломатлари бўлмаслиги керак. Ўта мустаҳкам ойна яхлит дўкон эшикларини ишлашда, зарбга дуч келиши мумкин бўлган деразаларга солишда кенг ишлатилади.
Қурилишда безакбоп термолюкс — турли рангдаги (ҳаворанг, яшил, қизил, олтинранг ва ҳ.к.) иккита тахта ойнадан ташкил топган пакетлар кўплаб ишлатилмоқда. Улар товушни изолят­сиялаш хусусиятига эга бўлади. Безакбоп ойна пакетларнинг қалинлиги 5,5 мм бўлса, уларнинг товушни изоляциялаш ху­сусияти 35 дБ гача етади. Бундай хусусиятлар асосан кўча юзидаги дера­заларда катта аҳамиятга эга, чунки кўчадаги шовқин кундуз куни 100 дБ, кечаси эса 50 дБ гача бўлиши мумкин. Бундай ойна тахталардан ташкил топган пакетларнинг асосий хусусиятлари 5.1-жадвалда келтирилган.


5.1-жадвал