Э. ҚОсимов, М. Aкбaров пaрдозбоп қурилиш aшёлaри

Сирли қатлам — эриганда шишасимон ҳолатга ўтувчи осон эрийдиган лойнинг буюм юзасига суртиб, кейин куйдирганда ҳосил бўлган қатламдир. Сирланган плитка юзаси жуда текис бўлганлиги туфайли, унда сув ёки чанг ушланмайди. Турли ранглар билан қориштириб суртилган сирли плиткалар девор сиртини безашда, меъ­морчиликда ва бошқа мақсадларда кўплаб ишлатилади. Пардозбоп плиткалар юқори сифатли лой қоришмасидан нам ёки ним қуруқ усул билан тайёрланади.
Кўпинча биноларнинг ички деворларини қоплашда маёлик ва фаянс сопол плиткалар ишлатилади. Фаянс учун хомашё сифатида каолин, дала шпати ва кварс қуми ишлатилади. Маёлик плиткалар табиий куйган тупроқдан олинади ва уларнинг юзаси сирланади. Плиткаларни таснифлаганда қуйидаги хилларга бўлинади: юзасининг шаклига кўра буюртма таснифли ва фактурали; юзасидаги сирнинг хилига кўра — ялтироқ, қўнғир ва бир хил ёки кўп рангли хира тасвирли. Ички деворларини қоплашда қўлланиладиган плиткаларнинг хиллари 4.10-расмда кўрсатилган.
Пишириш хумдонидан чиққан сопол плитка сирти сирланади ва у мустаҳкам ёпишиши учун қайтадан пишириш хумдонига киритилади. Қурилишда қалинлиги 8, 10 ва 13 мм ли, тўғри тўртбурчак шаклидаги сопол плиткалар кўп ишлатилади. Aгар плитка фаянс, соғ-тупроқ, кварс қуми ва каолин аралашмаларидан тайёрланса, унинг қалинлиги 5-6 мм бўлади.
Пардозбоп плиткаларни қабул қилишда, асосан улар ўлчами­нинг аниқлигига, сиртининг текислигига ва рангининг тиниқлигига эътибор бериш зарур. Рангнинг тиниқ ёки бир хилдалигини аниқлаш учун бир неча плиткани териб, уларда 8—10 м масофадан қаралади. Aгар ранглар ҳар хил бўлса ёки бошқа нуқсонлар топилса плиткалар яроқсиз деб топилади.
Кислота ва ишқор эритмалари таъсирига чидамли сопол ашёлар кимё заводларидаги асбоб-ускуналарни муҳофаза қилишда кўп ишлатилади. Масалан, қувурлар, зарарли суюқликлар сақлайдиган идишлар, шамоллатиш асбоблари шулар жумласидандир. Бундай буюмлар таркибида зарарли аралашмалар (гипс, колчедан ва ҳ.к.) бўлмаслиги керак. Кислоталарга чидамли сопол плиткалар «К» деб белгиланади.