Э. ҚОсимов, М. Aкбaров пaрдозбоп қурилиш aшёлaри

Ёғоч қатлам пластиклар юқори сифатли тўғри ходадан тилиб олинган юпқа листларни термореактив смолалар шимдириб, уларни юқори ҳарорат ва босим остида ўзаро ёпиштириб олинади. Ёғоч пластик қатлам қуйидаги ўлчамларда тайёрланади: узунлиги 70—560 см, эни 90—120 см ва қалинлиги 2—100 мм. У тураржой, жамоат бинолари қурилишларида пардозбоп ва конструктив ашё сифатида кўп ишлатилади.
Органик шиша — оддий дераза ойналари каби нур ўтказувчан ва унинг таъсирига чидамли енгил ашё. Вақт ўтиши билан органик шишада хиралашиш ёки сарғайиш, шунингдек, мўртлашиш аломатлари бўлмайди. Бундан ташқари, об-ҳавода мутлақо ўз хусусиятини, кўринишини ўзгартирмайди. Унинг эгилувчанлиги ва юқори мустаҳкамлиги саноатнинг кўпгина тармоқларида ишлатишга имкон беради. У 60°C гача иситилса жуда осон эгилади ва турли буюмлар ишлашга имконият яратилади. 120°C да жуда юмшоқ, 160°C да оқувчан бўлади, 300°C дан юқори ҳароратда эса у ёниш хусусиятига эга. Органик шиша узунлиги 10—135 см, эни 10—125 см ва қалинлиги 2—25 мм га тенг қилиб тахта шаклида ишлаб чиқарилади. Органик шишани рангли, хира ва рангсиз қилиб ҳам тайёрлаш мумкин. Унинг ҳажмий оғирлиги 1200 кг/м³ га тенг. Органик шиша нур ўтказувчан девор ва пардадевор, дераза ўрни ва буғ хоналарни беркитишда, шунингдек, саноат иншоотларида ишлатилади.
Серғовак пластмассалар. Aри уясисимон пластика (сотопласт) деворчалари тўғри геометрик шакллардан иборат бўлган, ораси эса бўшлиқдан ташкил топган ашё. Aри уясисимон пластика газлама, қоғоз, ёғоч листи ва шунга ўхшаш юпқа ашёларни термореактив смолалар шимдириб, юқори босим ва ҳарорат остида зичлаб, сўнг уларни ўзаро ёпиштириб олинади. Aри уясини эслатувчи бўшлиқ деворларининг икки томони пластик листлари билан ёпиштирилади ва қуйидаги ўлчамларда кесилиб, блоклар тайёрланади. Уларнинг узунлиги 100—150 см, эни 55—65 см ва қалинлиги 30—35 см га тенг. Шимдириб кейин қуритилган тайёр блок ярим ялтироқ ва бикр бўлиб чиқади.
Aри уясисимон пластиклар, асосан иссиқликни кам ўтказувчан ашё сифатида ишлатилади. Уни темир-бетон деворбоп панеллар орасига иссиқликни муҳофазаловчи қатлам, икки томони СВAМ ёки ёғоч қатлам пластиклари билан ўралган пардевор блоклари сифатида ишлатиш мумкин.