Е. Б. Бабский, А. А. Зубков, Г. И. Косицкий, Б. И. Ходоров

Витамин В6 (пиридоксин)
Витамин В6 бир-бирига яқин витаминлар группасидир. Улардан организмга кўпроқ аҳамиятлиси — пиридоксиндир, бу витамин организмда пиридоксальфосфатга айланади; пиридоксальфосфат эса бир қанча ферментларнинг актив группасидир.
А. Е. Браунштейн ва бошқаларнинг кўрсатишича, пиридоксин ҳосилалари аминокислоталар алмашинувида иштирок этади: амин группасини бир аминокислотадан иккинчисига ўтказади (қайта аминланиш реакцияси) ва аминокислоталарни декарбоксиллайди. Бундан ташқари, пиридоксин яна бир группа сульфгидрил группаларни ўтказишда ва ёғ алмашинувида (хусусан тўйинмаган кислоталар алмашинувида) қатнашади.
Ҳайвон овқатида пиридоксин бўлмаганда териси яллиғланган (дерматит), қон таркиби ўзгарган (анемия пайдо бўлган ва лимфоцитлар камайган) ва талваса тутган. Одамдаги пиридоксин авитаминози кузатилгани ҳақида айрим маълумотлар бор; айни вақтда анемия пайдо бўлганлиги ва талваса тутганлиги қайд қилинган.
Пиридоксин ичак бактерияларида синтезланади. Шунинг учун бу витамин овқатда бўлмаса ҳам, одам унга эҳтиёж сезмайди. Аммо ичак бактерияларининг ривожланиши замонавий кучли антибиотиклар билан тўхтатилган бўлса, пиридоксин авитаминози пайдо бўлиши мумкнн.
Одамга бир суткада қарийб 2—3 мг пиридоксин зарур. Ачитқи, жигар, буйрак, мускуллар витамин В₆ га бой.
Пантотен кислота
Пантотен кислота ҳамма ҳужайраларнинг ўсиши учун аҳамиятли бўлиб, жуда кенг тарқалган (унинг «пантотен» деган номи шундан олинган, грекча бу сўзнинг маъноси — ҳар қаерда бор демакдир). Экспериментал ҳайвонлар овқатида пантотен кислота етишмаслиги натижасида ўсиш тўхтайди, гавда вазни камаяди, тери патологик ўзгаришга учрайди, соч оқаради, анемия пайдо бўлади, буйрак усти безлари зарарланади; итлар талвасага тушиб, ўлиб қолади.
Паптотен кислота организмда рўй берадиган бир қанча химиявий ўзгаришларда иштирок этувчи ацетилкоэнзим А таркибига киради.
Одамга бир суткада 5—10 мг пантотен кислота керак; одам аралаш овқатлар еб турганда бу витаминга эҳтиёж тўла қопланади.