Диссертация мавзусининг долзарблиги ва зарурати

Тадқиқотнинг Республика фан ва технологиялари ривожланишнинг устувор йўналишларига мослиги. Мазкур тадқиқот иши Республика фан ва технологияларни ривожлантиришнинг Ι. «Демократик ва ҳуқуқий жамиятни маънавий аҳлоқий ва маданий ривожлантириш, инновацион иқтисодиётни ривожлантириш» устувор йўналиши доирасида бажарилган.
Муаммонинг ўрганилганлик даражаси. Муаммога доир тадқиқот ишларини ўрганиб, уларни илмий жиҳатдан таҳлил этиш асосида маълум бўлдики, имконияти чекланган шахсларнинг ижтимоий мослашув муаммоларига доир бирмунча тадқиқотлар олиб борилган, аммо бу ишлар чет эл мамлакатларида яратилганлиги учун уларда бизнинг маҳаллий шарт-шароитлар ҳисобга олинмаган.
Эшитишида нуқсони бўлган шахсларнинг ижтимоий мослашув масалаларига бағишланган илмий тадқиқот ишларида махсус (коррекцион) мактаб-интернатларда ташкил этилган таълим жараёнини модернизация қилишга доир ёндашувлар ўз ифодасини топган.
Республикамизда эшитишида нуқсони бўлган болаларга таълим-тарбия бериш, уларнинг нуқсонларини коррекциялаш, маҳаллий хусусиятларни хисобга олган ҳолда эшитиш қобилиятини ривожлантиришнинг илмий-назарий, методик асослари Н.Бекмурадов, Х.Гайнутдинов, У.Файзиева, Н.Дадахўжаева, Ф.Алимхўжаева, Ф.Қодирова, Д.Назарова, Р.Рустамова, Д.Якубжановаларнинг илмий ишларида тадқиқ қилинган.
Эшитишида нуқсони бўлган шахсларнинг ижтимоий мослашув масалалари ҳамдўстлик мамлакатларида А.П.Гозова, А.Г.Зикеев, С.А.Зыков, О.Г.Гонца, Н.И.Букун, И.В.Цукерман, В.З.Базоев, Е.Г.Речицкая, Т.Г.Богданова, О.М.Рожко, Б.C.Собкин, Л.С.Измайлова, Н.О.Ярошевич, Э.В.Миронова, Н.Г.Морозова, В.С.Кукушин, О.И.Кукушкина, Л.А.Головчиц, И.В.Королева, Б.Д.Корсунскаялар ҳамда хорижий тадқиқотлар тажрибасида S.Watson, S.Henggeler, J.Whelan, R.Ivers, A.Abrams, J.Pray, E.Christian, T.Crowe, F.Martin, P.Stark, L.Hickson, P.Luft каби олимларнинг илмий изланишларида ўз ифодасини топган.
Имконияти чекланган шахсларнинг ижтимоий мослашувига доир масалалар махсус педагогика ва психология фанида мазкур доирада тадқиқ этилган бўлса-да, ушбу муаммо Ўзбекистонда эшитишида нуқсони бўлган болалар учун ихтисослаштирилган таълим муассасалари битирувчиларининг ижтимоий мослашув муаммолари махсус предмет сифатида ўрганилмаганлиги мазкур мавзуни танлашга асос бўлди.