Бухоро давлат университети илм ва эзгулик бухоро – 2016

ЖАҲОНГА ТАНИЛГАН ЎЗБЕКИСТОНЛИК ПСИХОЛОГ ОЛИМ


Б.Т.Тўраев,
Олий тоифали тарих-география фани ўқитувчиси

Бутун дунё мамлакатлари орасида бугунги ижтимоий-иқтисодий тараққиёт ривожланиши билан жаҳонга юз тутиб келаётган мустақил Ўзбекистонимизда йиллар давомида мисли кўрилмаган ижобий ўзгаришлар амалга оширилмоқда.

Мен 42 йиллик ўқитувчилик фаолиятимни эслаб, Когон туманидаги (ҳозирги 1- сонли) мактабда 9-синфда тарих ва география фанларидан дарс берганимда синфда қора қошли, кийимлари ўзига ярашган, кўзларига ўти бор, очиқ чеҳрали, доим мавзуни сўзлаб беришга тайёр, қўли кўтарилган ўқувчига кўзим тушар эди. Ундаги дўстларига, устозларга бўлган ҳурмат яққол кўзга ташланиб турар эди. Мен исмингни айт, болам деганимда Шарифжон, деб айтган эди. Ўшанда мен “Исминг жисмингга мос” деган эдим. Биламизки, маданиятга, маърифатга бой шаҳарларни ёнида Шариф сўзи қўшиб айтилади. М: Бухорои Шариф. Камтарин, фидойи, иқтидорли олим шогирдим Ш.Баротов мактабни тугатиб, Бухоро олийгоҳига ўқишга кирди Олийгоҳни тугатиб (1983 йилда) 1990 йилда Москвада номзодлик ишини ҳимоя қилганини, 1998 йилда Психология фанлари доктори илмий даражасини олганини айтганда мен ва барча устозлари учун энг бахтли кун бўлган, деб ҳисоблайман.
Ўзига хос самимийлик, камтарлик, эл дардига малҳам бўлиш ҳар қандай ҳолатда эл-юрт манфаати йўлида фидойилигини сезган олийгоҳ ва вилоят раҳбариятлари республика “Маънавият ва маърифат” маркази Бухоро вилоят бўлими раҳбари лавозимида (2002-2006 йилларда) ишлаган пайтлари шогирдимга яна бир ишонч билдириб, ЎзЛИДЕП партияси томонидан Ўзбекистон Республикаси Олий мажлисининг Қонунчилик палатаси депутатлигига номзод этиб кўрсатилди. Бу ҳам ёш олимга таълим тизимига, ижтимоий психология фани тараққиёти йўлидаги ва ҳамкасблари орасида маълум ҳаётий ва ижтимоий муаммолар ечимини излашда, ўз фаолияти доирасида теран билим ва юксак малака ва талабчанлик, янгиликка интилувчанлик хислатлари учун берилган юксак ишонч, деб биламан.
Шариф Баротов биргина Ўзбекистон эмас, балки жаҳон психологияси фанига илмий ғоялари билан ҳисса қўшган, бугунги кунда жаҳоннинг энг нуфузли психологларнинг академикларининг шогирдлари ҳисобланиб, улар қаторидан ўрин эгаллаб келаётган, Ўзбекистонда психологик хизматни ташкил этиш, уни амалиётга олиб кириш муаммосининг ҳал қилиш борасида бир қатор таълим ва меҳнат муассасаларида илмий – амалий тажрибалар муаллифи, Халқаро ва республика миқёсидаги илмий – амалий анжуманларнинг фидойи ташкилотчисига айланган олим ҳисобланади.
Эндигина 55 ёшга кирган олимнинг эришган ютуқлари, яъни Шарифжонннинг Халқаро Психология ФА Ўзбекистондаги регионал бўлим раҳбари сифатидаги фаолияти XXI аср психологиясига бағишланган бугунги Халқаро симпозиумнинг ташкилотчиси ва раҳбари эканлигининг ўзи ҳам барча устозларини қувонтиради.
Шогирдим Шарифжоннинг илм борасидаги фидоийлигига яна зафарлар тилаб, узоқ умр, сиҳат–саломатлик ва янада кўпроқ илмий баркамолликлар тилайман. Юртимиз, халқимиз , шогирдлари, устозлари ва ота- онасининг бахтига соғ-саломат бўлсин!