Бухоро давлат университети илм ва эзгулик бухоро – 2016

ЗУККО ОЛИМ, ТАШАББУСКОР РАҲБАР
Ф.М.Қосимов,
педагогика фанлари номзоди, доцент

Мен, Шариф Рамазонович Баротовни 1979 йил, Бухоро педагогика институти (ҳозирги Бухоро давлат университети) нинг педагогика факультети I босқич талабаси бўлган давридан бери биламан. Ш.Р.Баротовнинг талабалик давридаёқ илмга чанқоқлиги, ижодкорлиги, ташаббускорлиги, жамоатчилиги профессор-ўқитувчилар кўзига яққол ташланганди.

Фан асосларини пухта ўрганиши билан жамоат ишларига фаол иштирок этишини алоҳида қайд этиш жоиз. Шариф Баротов факультет талаба ёшлари қўмитаси раиси сифатида фаол иш олиб борди. Талабаларнинг пахта-йиғим терими даврида ўқитувчилар қаторида гуруҳ талабаларига раҳбарлик қилди. Ш.Р.Баротов билан пахта даласида суҳбат қилган пайтларимда, келгусида ижтимоий-гуманитар фанларни пухтароқ ўрганиб, психологиядан тадқиқот ишларини олиб боришни, инсон руҳияти билан боғлиқ кўплаб муаммолар ўз ечимини топилишини кутаётганини айтганди. Дарҳақиқат “интилганга толе ёр” деганларидек, Ш.Р.Баротов тадқиқот ишларини олиб бориб, психология фанлари доктори, даражасига бориб етди.
1984 йил хизмат сафари билан Москва давлат педагогика университетига бордим. Ўша вақтда Ш.Р.Баротов Москва шаҳрида 4 ойлик малака ошириш курсида таҳсил олаётган эди. Мени дарҳол кутиб олиб, ётоқхонага жойлаштирди. Сафар даврида қилинадиган ишлар хусусида фикрлашиб, менинг тадқиқот ишларимни олиб боришга яқиндан ёрдам берди.
Педагогика факультети декан муовини лавозимида ишлаб юрган пайтларимда Ш.Р.Баротов педагогика кафедраси мудири эди. Ўша пайтларда кафедранинг ўқув-усулий илмий-тадқиқот, маънавий-маърифий йўналишларида кўпгина муваффақиятларга эришганининг гувоҳи бўлдим. Қайси топшириқ бўлмасин, Ш.Р.Баротов бошчилик қилган кафедра доимо уни биринчилардан бўлиб ижро қилар, ҳужжат масаласи таҳсинга сазовор эди.
Мана бир неча йилки, Ш.Р.Баротов педагогика факультети декани лавозимида фаолият кўрсатаяпти. Самимий, талабчан инсон раҳбарлик қилаётган факультет жамоаси олиб борилаётган ишлардан мамнун. Жамоа у кишини ҳурмат қилади. Илм ва эзгуликка йўғрилган фаолиятларини қадрлайди.
Ш.Р.Баротовнинг кўп қиррали фаолиятларига ҳамиша омад ёр бўлсин.