Agza aňkarmak — Kişi maslahatyna gulak gabartmak; biriniň pikirine eýermek.— Garrylaryň agzyna aňkarylmazlar-da, öz etjegiňi edibirler (A. Gowşudow). Öz ýanyndan ol adam hem Hoşgeldini “sary agyz”, göreniň agzyna aňkaryp ýören hasaplady

Başyňdan (iki egniňden) gum sowurmak — 1. Zähmet çekip işlemek, gara der saçyp zähmet çekmek; gara iş bilen güzeran dolamak. Başymdan gum sowrup oňşuk edýänime garaman, ähli gazananymy alyp gitdi. 2. Haýýarlyk etmek, boýun almazlyk, şerraýlyk etmek. Dawa tutup, başdan gumlar sowrup. Bolgusyz peşäni pile öwürip (Ý. Pirgulyýew).

Başyňy aşak salmak — 1. Pikire, oýa batmak, pikir etmek, oýlanmak.— Aý, içerik girip oturjak däl, Jeren eje —diýip, Weli ýene-de başyny aşak saldy (“Sowet edebiýaty”). Başyn aşak salyp, çykarman sesin, Içde, daşda gezim edýär mylaýym (B. Seýtäkow). Başyny aşak salyp, dilini ýarman otyrdy (A. Gurban). 2. Sussuň pes bolmak, kynçylyga ýan bermek, diliň gysga bolmak. Garyplyk çaga-çuga ýanynda, aýal ýanynda, gonşy-golam ýanynda başyňy aşak salýar (M. Ibrahimow).

Başy çaşmak — 1. Huşy gitmek, özüňi ýitirmek, aljyramak. Oýlana, oýlana çaşyrdym başym, Bu halym bilmeýär töwerek daşym (A. Kekilow). Bir az salym başy çaşdy Aýlaryň, Gyzgyn gany gaýnap joşdy Aýlaryň (B. Kerbabaýew). 2. Dagamak, pytramak. Bekmyrat baýy öldüräýsem welin, olaryň başy çaşar (H. Derýaýew).

Baş egmek — 1. Tagzym etmek, salam bermek. Ýigit baş egip, birnäçe gezek minnetdarlyk bildirdi-de maşyndan düşdi (B. Seýtäkow). Azat zähmetine baş egýär bar iş (R. Seýidow). 2. Tabyn bolmak, boýun egmek. Şowsuzlyk öňünde egdiňmi başyň, Näme üçin sussy pes-le görnüşiň? (B. Hudaýnazarow). Şahyr dostum, şol gözeliň işigniň, Öňünde, gel, başymyzy egeli (M. Seýidow).

Baş ýaýkamak — 1. puşman etmek. Başymyz açyk, aýagymyz ýalaňaç çopan-çoluk barymyz kowuldyk — diýip, hyrçyny dişläp başyny ýaýkady. 2. Närazylyk bildirmek, garşylyk görkezmek. Berdi başyny ýaýkap: — Ýok, Ogulnyýaz eje, bu ýürek baslyşar ýaly bolan däldir (H. Derýaýew).