Agza aňkarmak — Kişi maslahatyna gulak gabartmak; biriniň pikirine eýermek.— Garrylaryň agzyna aňkarylmazlar-da, öz etjegiňi edibirler (A. Gowşudow). Öz ýanyndan ol adam hem Hoşgeldini “sary agyz”, göreniň agzyna aňkaryp ýören hasaplady

Nazar salmak (etmek) — 1. Birine ýa-da bir zada yhlasly garamak, syn etmek. Nazaryň salmadyň, halym bilmediň (G. Muhtarow). Olar töwereklerine nazar salman, içerik girdiler (G. Kulyýew). Emma şol halatda onuň gözi ejesine düşmedi, ejesiniň ýerine özüne nazar edip oturan nämähremler toparyna düşdi (H. Derýaýew). 2. Göz-gulak bolmak, garaşyk etmek, kömek bermek, aladalanmak.

Naýza düzmek—1. Naýzalap öldürmek, gyrmak. Ol duşmanlary naýza düzüp, atyny debsiläp gaýtdy. 2. Hat üsti bilen ýamanlary beýan etmek, olar hakda ýazmak. Erbetleri naýzama düzäýmesem boljak däl. Ýat elementleri naýza düzdüm (A. Salyh).

Namysyna degmek — 1. Abraýdan düşmegine sebäp bolmak, mertebesini pese gaçyrmak, biabraý etmek. —Han aga, türkmenler ony halamaz, Namysyna degseň, seni sylamaz (Ata Köpekmergen). Bu mesele biziň maşgalamyzyň namysyna degeni üçin, ilki bilen kolhozyň soýlan goýunlaryny derrew bazardan alyp kolhoza geçirmeli (G. Muhtarow). Namysa degen duşmanyň üstüne gitmäge taýýarlanmaklyk kän wagt talap etdi (B. Seýtäkow). 2. El degirmek, zorlamak. Şol günden başlap ol özüni namysyna deglen hasaplady.

Nas etmek — 1. Urup, ýenjip mynjyratmak, gaýdyp garşylyk görkezmez ýaly etmek.— Weýrançylyga buýsanýan betpäl, seni bir nas edeýin! — Hany indi maňa bir maý beriň, kädili kelläni men nas edeýin! (B. Kerbabaýew). Ganhor ganymy nas edýär, Meniň batyr agalarym (N. Annagylyjow). 2. Hötdesinden gelmek, kemini goýman başarmak, hek etmek. Ol işi başarman kim başarsyn, tabşyryň-da göräýiň, nas ederin.

Nuh eýýamy (döwri) — I. Nuh pygamberiň ýaşan döwri. 2. Köp asyrlar, ýyllar mundan öň, ata-babam döwri, gadym eýýam. ...Ol bir nuh eýýamynda bolup geçen zat (A. Gowşudow). Nuhuň eýýamyndan galan pis işler, Täze durmuş gurýan ile ýaraşmaz (Mollamurt). ...Nuh döwründen galan adamlaryň agyzlaryna alýan sözlerine akyly haýran galdy (B. Kerbabaýew). Aşyklykdap, magşuklykdan Nuh döwründe — dynan kempir (K. Gurbannepesow).