Agza aňkarmak — Kişi maslahatyna gulak gabartmak; biriniň pikirine eýermek.— Garrylaryň agzyna aňkarylmazlar-da, öz etjegiňi edibirler (A. Gowşudow). Öz ýanyndan ol adam hem Hoşgeldini “sary agyz”, göreniň agzyna aňkaryp ýören hasaplady

Maňlaýyň (bagtyň) açylmak — 1. Bagtly bolmak, eşretli durmuşa ýetmek, işiň şowlap başlamak. Zorluk üstüne zorluk, Açylmady maňlaýym (O. Täçnazarow). — Aý oglum, seniň maňlaýyňa açylmak ýok öýdýän (A. Durdyýew). Bu boluşlary synlan ejesi, oglunyň maňlaýynyň açylmagyny hudaýdan dileg etdi (B. Seýtäkow). 2. Biri bilen durmuş gurmak, durmuşa çykmak, äre çykmak (aýal-gyzlar hakda); öýli-işikli bolmak, öýlenmek (erkek adamlar hakda). Tüweleme, Bagtygülüň gyzynyňam maňlaýy açylypdyr.

Mat bolmak — 1. Basylmak, ýeňilmek. Bize degen mat bolar (N. Pomma). 2. Ölmek. Görogly beg mat boldy, Ahyreti ýat boldy («Görogly»). 3. Ýatmak, utulmak (küşt oýnunda).

Mat etmek — 1. Ýok etmek, ýeňmek. Agzybirlik kynçylygy edýär mat, Garagumda ýazlap gezýär malymyz (Ata Köpekmergen). 2. Öldürmek, dyndarmak. Gara güni ýat etdiň. Duşmanlary mat etdiň (G. Gurbansähedow). 3. Ýatyrmak, utmak (küşt oýnunda).

Meçew bermek — 1. Götergiläp küşgürmek, gylaw bermek. Artyk Halnazaryň üýşüp duran bugdaýyna talaň urdurasy geldi, käbirleri oňa meçew hem berdiler. Halnazar haşlap dem alanda, Pekgi oňa meçew berdi (B. Kerbabaýew). 2. Goltgy bermek, ruhlandyrmak. Ýowarçylar biri-birlerine meçew berip, kömek işini özleriniňkiden jäht tutýarlar (B. Kerbabaýew).