Abbatisa – ayollar katolik monastirlarining boshqaruvchilari. Abbatlik

Sitsiliya tungi ibodati – 1282-yil Karl Anjuyskiy (Fransiya qiroli Lyudovik IX ning ukasi) ga qarshi Sitsiliyada koʻtarilgan qoʻzgʻalon. Ular Janubiy Italiya va Sitsiliyada fransuzlarning 1268-yilda oʻrnatilgan hukmronligiga qarshi chiqishgan. Karl Sitsiliyada soliqlarni oshirib yuborgan va mazkur hududda amal qilib kelgan an’analarni oʻzgartirishga harakat qilgan. Sitsiliya qirolligi poytaxtini Palermodan Neapolga koʻchiradi. Natijada 1282-yil 31-mart kuni Palermoda qoʻzgʻalon (kechki ibodat uchun cherkov qoʻngʻirogʻi chalinishi qoʻzgʻalonga chaqiriq boʻlgan) boshlanib, ular 3-4 ming nafar fransuzlarni qirib tashlashadi va Sitsiliya Fransiya zulmidan ozod boʻldi. 1282-yilda Sitsiliya taxtiga Aragoniya qiroli Pedro III taklif qilinadi va 1302-yildan boshlab Sitsiliya Janubiy Italiyadan ajratilib, Aragon sulolasi tomonidan boshqarilgan.
Sitsiliya qirolligi – XI asr oxirlarida Janubiy Italiya va Sitsiliyada normand ritsarlari tomonidan tashkil qilingan davlat. Qirollikning tashkil topishidagi oxirgi ish Rojer II ning (1130-1154) taxtga oʻtirish marosimi boʻldi. 1189-yilda Sitsiliya taxtiga germanlarning shtaufenlar sulolasi keladi va yangi sulola mamlakatning markazlashish jarayonini nihoyasiga yetkazdi. 1266-1268-yillarda Karl Anjuyskiy oxirgi shtaufenni yengadi va Sitsiliyada yangi sulola hukmronligi boshlanadi. Karl Anjuyskiyga qarshi koʻtarilgan xalq qoʻzgʻaloni natijasida qirollik ikki qismga ajralib ketdi va Sitsiliya oroli Aragoniyaga tegdi, Janubiy Italiyada yangi Neopolitan qirolligi tashkil topgan.
Situl – franklar davlatining karolinglar sulolasi davrida suyuq va mayda narsalarning oʻlchov birligi. U modiyning yarmiga yoki 25,75 litrga teng oʻlchov birligi boʻlgan.
Skaldlar – konunglarning drujinalari haqidagi qoʻshiqlarni kuylovchi qadimgi skandinav shoir va qoʻshiqchilari. Oʻzlarining jangovor qoʻshiqlari (drapax) da konunglarning jasorati, drujinalarning boshidan kechirgan sarguzashtlari musiqasiz kuylangan. Yuz yillar davomida qoʻshiqlarni kuylash tartibi oʻzgar-magan va qat’iy an’anaga amal qilgan. S.ning mualliflari orasida 350 dan ortiq shoirlarning nomi tilga olingan. Dastlabki S. IX asrda Norvegiyada paydo boʻlgan. X asrda mazkur san’at Islandiyada juda ommalashgan. Shu davrda S.ning asosiy qismi Islandiya zodagonlari saroylaridan yetishib chiqqan. Ular orasida Egil Skallagrimsson (900–928) va Snorri Sturlusonning nomlari mashhur boʻlgan. S. poeziyasining asosiy janrlari – drapa, nid va visa.
Skipetr (yunon. xassa, tayoq, aso) – monarxiya hokimiyatining “temir” belgisi. Ilk bora qadimgi firavnlar foydalangan. Asosan oltin va fil suyagidan yasalgan, qimmatbaho toshlar bilan bezatilgan. Oʻrta asrlarda S. qirolning saxiyligini va unga itoatning ramzi sanalgan. Diniy boshliqlarda ham bo’lgan.