Abbatisa – ayollar katolik monastirlarining boshqaruvchilari. Abbatlik

Eshevenlar – Shimoliy Fransiya shaharlarida sud va ma’muriy vazifalarni bajaruvchi lavozim.
Eskvayr, skvayr, shkvayr (lot. scutarius–qalqonchi) – ilk oʻrta asrlarda ritsarning qurolbardori. E. shunday shaxs boʻlganki, u ritsarlik unvoni olish huquqiga ega boʻlgan, ammo hali ritsarlik unvoni olmagan shaxs. Lavozim avloddan avlodga meros boʻlib qolmagan. Soʻnggi oʻrta asrlar va yangi zamon davriga kelib E. unvoni perning kichik oʻgʻliga va kichik oʻgʻlining katta oʻgʻliga, ritsarlarning katta oʻgʻliga va katta oʻgʻlining katta oʻgʻliga nisbatan ishlatilgan. Bu vaqtga kelib unvon barcha madaniyatli insonlar (jentlmenlar) orasida tarqalgan va “jentlmen” atamasi bilan bir xil ma’noda ishlatilgan. Qisqargan koʻrinishi skvayr boʻlgan.
Espanola – Xristofor Kolumb Gaiti orollariga yetib borgach qoʻygan rasmiy nom. “Ispan orollari” ma’nosini beradi.

~ F ~

Fablio – (lot. fibula – ertak, masal) – XII asrda vujudga kelgan fransuz shahar adabiyoti janrlaridan biri boʻlib, XIV asr boshlarida oʻz taraqqiyotining choʻqqisiga erishgan. Bu asarlar hajm jihatidan kichik qoʻshiqlar, novellalardan iborat boʻlib, ular ma’lum ma’nodagi satira bilan birgalikda aytilgan. F.lar tematika jihatidan turli tuman boʻlgan. F.lar orasida “Titam”, “Qashshoq savdogar haqida” va boshqalar xalq orasida mashhur boʻlgan. Fransiyada XII-XIII asrlarda shaharlar, ritsarlar va feodallarning qasrlarida shakllangan tartiblar tanqid ostiga olingan. F.lar keyingi davr yozuvchilaridan J.Bakachcho, F.Rable, Molyer va boshqalar asarlarida yangi syujetlar uchun ishlatilgan.
Faktoriya (ingl.) – boshqa davlatdagi biror-bir davlatning savdo idorasi va undagi savdogarlar manzilgohi.
Fakultet – (lot. fakultas – qobiliyat) – dastlabki paytlarda ma’lum bir fan sohasida egallangan bilimni bildirgan. Yevropada universitetlarning vujudga kela boshlashi bilan ma’lum bir fan sohasi oʻqituvchilarining birlashmasiga nisbatan ishlatilgan. Odatda oʻrta asr universitetlarida 4 ta F. mavjud boʻlgan. Ular ilohiyot, huquq, tibbiyot va erkin san’at F.lari edi. F.lar kichik va katta deb nomlangan ikki guruhga ajratilgan. F.lardagi ta’lim muddati 6 yilni tashkil etgan. Kichik F.ni tugatgan talabalarga magistr darajasi berilgan. Ayrim universitetlarda F.lar milliy guruhlarga qarab ajratilgan. Mas. Parij universitetida gall, pikardiya, normand va ingliz milliy guruhlariga boʻlingan. Bolonya universitetida talabalikka faqat 30 yoshdan oshgan kishilarni qabul qilishgan. Ilohiyotdan boshqa F.larda ta’lim olish muddati 5-6 yilni tashkil qilgan boʻlsa, ilohiyot F.da 15 yil boʻlgan.