A. M. Karimova, D. M. Malikova pul va banklar

Kredit quyidagi vazifalarni bajaradi:

1.Kreditning eng muhim vazifasi ijtimoiy ishlab chiqarish uzluksizligini ta’minlashdan iboratdir. Takror ishlab chiqarish jarayonida mahsulotlarni ishlab chiqarish va sotish vaqti, ana shu mahsulotlarni ishlab chiqarish uchun zarur boʻlgan resurslarni sotib olish va mehnatga haq toʻlash vaqti bilan oʻzaro mos kelmaydi. Ana shu sababli ishlab chiqaruvchilarda ayrim hollarda pul mablag’lari yetishmaydi, boshqa hollarda esa pul mablag’lari boʻla turib, unga ehtiyoj boʻlmaydi, ya’ni, pul boʻsh turib qoladi.
Aksariyat korxonalar ishlab chiqarish resurslarini sotib olish uchun oʻz mablag’lari yetarli boʻlmagan hollarda zarur boʻlgan pul mablag’lari va tovarlarni kreditga olishlari mumkin.
2. Kredit vositasida muomalaga pulga tenglashtirilgan toʻlov vositalari boʻlgan veksel, chek, sertifikat, kredit kartochkalari va boshqalar chiqariladi. Bu vositalar yordamida naqd pulli operasiyalarni naqd pulsiz hisob-kitoblar bilan almashtiriladi. Natijada toʻlovlar tezlashadi, muomala xarajatlari tejaladi.
3. Kredit orqali pul mablag’lari turli tarmoqlar va sohalar oʻrtasida qayta taqsimlanadi. Ma’lumki kreditdan foydalanganlik uchun haq toʻlanadi, ya’ni, kredit sotib olinadi. Qaysi ishlab chiqaruvchiga pul mablag’lari zarur boʻlsa, uni sotib oladi va undan foydalanadi. Shunday qilib, pul mablag’lari va ishlab chiqarish resurslarining turli tarmoqlar oʻrtasida erkin koʻchib yurishi ta’minlanadi.
4. Kredit vositasida jamiyatdagi boʻsh pul mablag’lari jamg’arib boriladi va harakatdagi kapitalga aylantiriladi ya’ni, u yoki bu sohani rivojlantirishga, ishlab chiqarishni kengaytirishga sarflanadi.
5. Kredit vositasida jamiyatda iqtisodiy oʻsish va ishlab chiqarishni rag’batlantirish imkoniyati tug’iladi. Sababi, qarz oluvchi nafaqat olgan kreditini qaytarish va kredit foizini toʻlash uchun ishlaydi, balki oʻzi ham daromad olishni koʻzlaydi. Buning uchun esa oʻz faoliyatida yuqori samaradorlikka erishishga harakat qiladi.