7мавзу. Ташкилотда менежернинг хулқи

Ўз оилангиз ҳақида ўйлаб кўринг. Унда сиз қандай мавқени эгаллайсиз? Оила бошлиғи ким эди? Ким раҳбарга қарши юради ва қандай қилиб? Ким муросасизлик қиладию, ким енгилади? Энди ўзингизнинг ҳозирги мавқеингизни ўйлаб кўринг. Сиз атрофингиздагилар билан сўзлашасизми ёки жим туришни афзал кўрасизми? Сиз янги ғояларни илгари сурасизми? Бошқаларни қўллаб-қувватлайсизми? Ва ҳ.к.
Бу саволларга жавоб бериб, сиз ижтимоий гуруҳнинг аъзоси сифатида ўз хулқ-атворингиз моделини кўришингиз мумкин. Худди Сизга ўхшаб, Сизнинг қўл остингиздагилар ҳам маълум хулқ-атвор моделига амал қиладилар. Ўз жамоангизни кузатиб кўринг, Ким етакчилик қилаяпти? Ким етакчига эргашяпти? Улар буни бажонидил қилаяптиларми ёки истар-истамас қилаяптиларми? Гуруҳда назоратни амалга ошириш мусобақаси борми? Инсонлар ўз фикрларини айтишга, қарши туришга, таклифлар беришга қўрқадиларми?
Бу саволларга жавоб излаш жараёнида сиз жамоангизнинг ўсиш динамикасини кузатишингиз ва атрофингиздаги кишиларни яхши тушуниб боришингиз мумкин. Бу Сизга гуруҳ мажлисини янада самарали ўтказишингизга ёрдам беради.
Мажлислар. Сиз янги лавозимга ўтиб, қўл остингиздагилар қандай мажлисларга кўникканлигини аниқлаб олишингиз лозим. Улар қай йўсинда ўтказилади, қанча вақт давом этади, ким уларни чақиради, кун тартибини ким белгилайди, унга қўл остингиздагилар қандай муносабатда бўладилар. Инсонлар мажлисларни ҳамкасблар билан мулоқотда бўлишнинг яхши имконияти деб ҳисоблашлари мумкин, баъзан эса бу ортиқча юк ва вақтни беҳуда ўтказиш деб ўйлашлари ҳам мумкин. Ҳатто Сизнинг ташкилотингиз одатда мажлис ўтказмаса ҳам, Сиз шундай одат ўрнатишингиз лозим, чунки мажлис жамоада зарур бўлган муҳитни сақлаб турадиган ва қўл остингиздагиларнинг ўзаро мулоқот қилишига имконият берадиган услублардан биридир.
Тадқиқотчиларнинг фикрича, етакчилар бошқалардан фарқланувчи бир талай ноёб фазилатларга эга бўладилар. Олимлар ана шу етакчилик фазилатларини аниқлашга ва шу йўл билан етакчиларни топишга уриндилар. Улар етакчилик туғма фазилат бўлади, деган хулосага келдилар.
Кейинги тадқиқотлар натижасида етакчилик фазилатларининг тўртта гуруҳи аниқланди, булар: жисмоний, руҳий (ҳис-туйғу), интеллектуал (ақлий), шахсий, ишчанлик фазилатларидир.