«Финанслық есап» пәни бойынша курс жумысын жазыў ушын усыныс етилип атырған темалар базар экономикасына өтиўдиң өзбек моделинен келип шығып, бухгалтерия есабының халық аралық стандартларына сәйкес системасын жарытыў, экономикалық өзгерис ҳәм реформаларды анализлеўди улыўмаластырыў тийкарында дүзилген болып, тийкарынан изертлеў алып барыў имканиятлары инабатқа алынған. Кафедра тәрепинен темаларды ислеп шығыўда Республикамызда әмелге асырылып атырған экономикалық реформалардың барысы ҳәм есап сиясатын шөлкемлестириўде шешимин күтип атырған машқалалар есапқа алынған.
Курс жумысының темасы ҳәр бир талаба тәрепинен “Финанслық есап” пәни бойынша усыныс етилген темалардың дизиминен ғәрезсиз түрде таңлап алынады. Бунда талаба таңлаған теманың актуаллығы ҳәм топланған әмелий тәжирийбеси, бар болған машқалаларды анықлай алатуғынлығын дәлиллеп бериўи зәрүр.
Курс жумысының темаларын таңлаўдағы тийкарғы итибар бухгалтерия есабының халық аралық стандартлар дәрежесинде жетилистириўдиң тийкарғы бағдарларына қаратылған. Теманың туўры таңланыўы болса излениўдиң әўметли тамамланыўын тәмийнлейди. Талаба курс жумысының темасы бойынша анық бир қарарға келгеннен кейин, өзи тәрепинен таңлап алынған теманы бекитиў ҳаққында “Бухгалтериялық есап ҳәм аудит” кафедрасы баслығы атына арза жазады.
Талаба тайынланған басшы менен ушырасыў усыныс етилип, курс жумысының темалары ҳәм илимий басшыларын белгилеў бойынша көрсетпе таярлаў «Бухгалтериялық есап ҳәм аудит» кафедрасының баслығы тәрепинен әмелге асырылады. Курс жумысының темалары талабалар ҳәм илимий басшыларға бекитилгени ҳаққындағы көрсетпеден кейин, темалардың аты ҳәм рәсмийлестирилиўи бойынша бирде-бир өзгерис киритиў ямаса белгиленген илимий басшыны өзгертиўге жол қойылмайды. Курс жумысының темасы таңланғаннан кейин, талаба илимий басшының тиккелей қатнасында курс жумысының жобасын ислеп шығады. Онда қойылатуғын сораўлар логикалық избе-изликте болыўы шәрт. Курс жумысы бойынша талаба илимий басшы менен олардың көз-қарасларының туўрылығы анықланады, қойылған мәселелерди шешиў жол-жобалары, илимий излениў бағдары белгиленеди.
Талаба курс жумысының басшысы менен мәсләҳәтлесиўлери алдыннан белгиленген күнлер ҳәм саатларда үзиликсиз рәўиште өткерилип барылады. Мәсләҳәтлер ўақтында талаба тәрепинен курс жумысы жобасының орынланыўы көрип шығылады ҳәм курс жумысының барысы додаланады.
Курс жумысының басшысы талабаға басқа мәселелерде де жәрдем береди, яғный:
а) тема бойынша зәрүр әдебиятлар, статистикалық мағлыўматлар ҳәм басқа дереклерден пайдаланыў менен байланыслы усыныслар бериў;
б) курс жумысының темасы бойынша үзиликсиз сәўбетлесиўлер ҳәм мәсләҳәтлер өткерип турыў;
в) орынланған жумыстың мазмунын бөлимлер бойынша ҳәм де толығы менен баҳалаў;
г) курс жумысын жақлаўға усыныс етиўге разылық бериў.
Жуўмақлап айтқанда, курс жумысының басшысы талабаға илимий ҳәм методикалық жәрдем көрсетип турады. Курс жумысының ақырына жеткерилиў үстинен үзликсиз қадағалап барады. Сондай ақ, айырым жағдайларда мәлим өзгерислер киритеди, анаў ямаса мынаў қарарды қабыллаўдың мақсетке муўапықлығын тастыйықлайды ҳәм де жумыстың ақырына жеткерилгенлиги ҳаққында сын береди.
2.Курс жумысының темасы бойынша илимий әдебиятлар ҳәм басқа материалларды жыйнаў Талаба таңлаған курс жумысының темасы бойынша жетерли дәрежеде материалларды топлаўы шәрт. “Финанслық есап” пәни бойынша усыныс етилген курс жумысының темалары бойынша топланатуғын материаллар төмендеги топарларға бөлинеди:
1. ӨЗБЕКИСТАН Республикасының Нызамлары, Президент Пәрманлары ҳәм Министрлер Кабинетиниң қарарлары.
2. Президент И.А.Каримовтың илимий мийнетлери ҳәм монографиялары.
3. ӨЗБЕКИСТАН Республикасы Финанс министрлиги ҳәм басқа министрликлердиң нормативлик ҳүжжетлери.
4. Бухгалтерия есабының миллий ҳәм халық аралық стандартлары.
5. Экономист алымлардың сабақлық, монография, оқыў ҳәм методикалық қолланбалары.
6. Экономикалық журнал ҳәм газеталарда басып шығарылған мақалалар.
7. Хожалық жүритиўши субъектлердиң финанслық есапқа байланыслы ҳүжжетлери.
8. Интернет сайтларындағы мағлыўматлар.
Талабаның теманы қәншелли терең мәниде жазыўы ҳәм оны байытыўы, өзиниң таңлаған темасы бойынша мағлыўмат ҳәм илимий дәреклерден хабардар болыў дәрежесине байланыслы. Талаба тек финанслық есап темаларына сәйкес әдебиятлар каталогларын емес, бәлким таңлаған темасына жақын теориялық машқалаларды өз ишине алған әдебиятларды да терең үйрениў лазым. Талаба жоқарыда санап өтилген дәреклерден курс жумысының темасы бойынша керекли материалларды топлайды.
Соны алдына айтып өтиў керек, талаба өзине тийисли деректен нусқа алып, оны өз алдына папкада топлаўы мақсетке муўапық. Усы папкада әдебият ҳәм мақалалардың авторы, аты, басып шығарылған жылы, баспаханасы ҳәм көлеми сәўлелендириледи. Әдебиятлар фонды жаратылғаннан соң талабаға курс жумысын жазыў ҳәм оны тәрипке келтириў имканияты кеңейеди. Топланған барлық илимий-теориялық дереклер үйренилип, курс жумысының кирис бөлиминде илимий тартыс формасында қысқаша келтирилиўи курс жумысының және де мазмунлы орынланыўына имканият жаратады.
