Mavzu: Sobiq ittifoq davrida O’zbekiston tarixining yoritilishi

Mavzu: Sobiq ittifoq davrida O’zbekiston tarixining yoritilishi

Reja

• 
  1920-30- yillarda Sovet hokimiyatining mamlakatda ma'muriy-buyruqbozlik siyosati
  
• 
  Ta'lim, fan va madaniyat, milliy munosabatlarda bolsheviklar mafkurasi hukmronligining kuchayishi.
  
• 
  Totalitar, ma'muriy – buyruqbozlik siyosatining kuchayishi va qatag‘onlik siyosatining vujudga kelishi.
  
• 
  Qatag‘onlik siyosati va uning O‘zbekiston xalqlari boshiga keltirgan kulfatlari
  

Islom Karimov, O’zbekiston Respublikasi birinchi prezidenti

Bu davrning ilgarigi zamonlardan farqi shuki,.. ayniqsa, sho’rolar hukmronligi yillarida xalqimiz tashqi dunyodan butunlay uzilib qo’yildi. Yetmish yildan ortiq davrda boshimizdan qanday ma’naviy, madaniy tazyiq, xo’rliklar kechganini ham yaxshi bilamiz…

Men aytmoqchi bo’lgan fikr… ana shunday har tomonlama mudhish, chetdan qaraganda xalqimiz, uning madaniyati, milliy tafakkuri, urf-odatlari, turmush tarsi, hech bir mubolag’asiz aytish mumkinki, nasl-nasabi yo’q bo’lib ketishi kerak bo’lgan sharoitda, baribir qator yo’qotishlar bilan bo’lsa ham, millatimiz o’zligini saqlab qololdimi yo yo’qmi? Olimlarimiz shu savolga javob bersinlar.

1920-30- yillarda Sovet hokimiyatining mamlakatda ma'muriy-buyruqbozlik siyosati

20-yillarning oxirlarida mamlakatda ma'muriy-buyruqbozlik tizimi kuchayib, yangi iqtisodiy siyosat o‘z mohiyatini yo‘qota boshladi. Oqibatda, erkin savdo va xususiy tadbirkorlikka chek qo‘yildi. Mamlakatni sanoatlashtirish va qishloq xo‘jaligini jamoalashtirish harakati ko‘pincha xalqning xohish-istaklariga zid ravishda, kuch ishlatish yo‘li bilan amalga oshirildi. Mamlakatda oziq-ovqat tanqisligini bartaraf qilish uchun dehqonlarning yetishtirgan mahsulotlari majburan tortib olinib, shaharlarda “kartochka” tartibi joriy qilindi. 1929-yilgacha xalq xo‘jaligi 1 yillik, 1929 yildan 5 yillik rejalar asosida boshqarildi. 1 - besh yillikdan boshlab sanoatlashtirish va qishloq xo‘jaligini jamoalashtirish siyosatiga zo‘r berildi. O‘sha davrdan e'tiboran respublikaning butun ijtimoiy-iqtisodiy hayoti kommunistik partiyaning qattiq nazorati ostiga olindi. Insonlarning hayoti, ularning o‘y-fikrlari mavhum yangi jamiyat qurish g‘oyasini amalga oshirishga, haddan tashqari tig‘iz va uddalash nihoyatda og‘ir bo‘lgan besh yillik topshiriqlarni bajarishga bo‘ysundirildi.