4. Мавзу: Табиий ресурслар ва уларнинг турлари Маърузанинг режаси: Табиий ресурслар ва уларнинг классификацияси

4. Мавзу: Табиий ресурслар ва уларнинг турлари


Маърузанинг режаси:
1. Табиий ресурслар ва уларнинг классификацияси.

Мавзуга доир таянч иборалар

ресурс, фойдаланиш вақти, таркибий тузилиши, кимёвий элемент, бирикмалар, тугайдиган, тугамайдиган, тикланадиган, тикланмайдиган, ер, сув, ҳаво, қуёш радиацияси, ўсимлик дунёси, ҳайвонот дунёси, иқлим, шамол, кўпқирралилик, регионаллик, ўзаро боғлиқлик, иқтисодий, гигиена-соғломлаштириш, тарбиявий, эстетик, илмий идрок қилиш.

1. Табиий ресурслар ва уларнинг классификацияси

Ресурс французча сўз бўлиб, «ressources» – восита, заҳира деган таржимани беради. Табиий ресурслар – бу инсон ўзининг ҳаёт фаолияти учун табиатдан оладиган ёки келажакда олиши мумкин бўлган барча воситалардир. Табиат инсон учун яшаш муҳити ва ресурслар манбаи бўлиб ҳисобланади. Атмосфера ҳавоси, ер, сув, қуёш нури, иқлим, ер ости бойликлари, ўсимликлар ва ҳайвонот дунёси – буларнинг барчаси табиий ресурслардир.


Табиий ресурсларнинг классификацияси.
1. Табиий ресурслар улардан фойдаланиш вақтига кўра иккига бўлинади: реал ва потенциал ресурслар.
а. Реал ресурсларга инсон ҳозирги вақтда фойдаланаётган воситалар киради.
б. Потенциал ресурслар эса инсон айрим сабабларга кўра ҳозирча фойдаланмаётган, аммо келажакда фойдаланиши мумкин бўлган ресурслардир.


2. Табиий ресурслар ўзларининг таркибий тузилишига кўра ҳам иккига бўлинади: элементар (содда) ва комплекс (мураккаб) ресурслар.
а. Элементар ресурсларга Менделеевнинг даврий системасидаги барча кимёвий элементларни, шунингдек шамол энергияси ва фазовий нурларни киритиш мумкин.
б. Комплекс ресурсларга кимёвий элементларнинг бирикмаларини (мас., тошкўмир, сув, ҳаво, турли хилдаги рудалар ва ҳ.к.) киритиш мумкин. Демак, комплекс ресурслар элементар ресурслардан ташкил топади.
Элементар ва комплекс ресурслар тушунчасини жонли табиатга нисбатан ҳам қўллаш мумкин. Бу ўринда элементар ресурсларга мисол қилиб маълум бир майдондаги ўсимлик ёки ҳайвон популяциясини олиш мумкин. Шу майдондаги биоценозни эса комплекс ресурс дейиш мумкин.