Ўзбекистон Республикасининг «Ҳуқуқбузарликлар профилактикаси тўғрисида»

41-модда. Ички ишлар органларининг маъмурий назорати
Ички ишлар органларининг жазони ижро этиш муассасаларидан озод қилинган шахслар устидан маъмурий назорати тарбиявий-профилактик таъсир кўрсатиш чора-тадбирлари мажмуидан иборат бўлади ва назорат остидагиларга нисбатан қонун ҳужжатларида назарда тутилган чекловларни қўллашдан иборат бўлади.
Маъмурий назоратни ўрнатиш, амалга ошириш ва тугатиш тартиби, шунингдек қўлланиладиган чекловлар рўйхати жазони ижро этиш муассасаларидан озод қилинган шахслар устидан ички ишлар органларининг маъмурий назорати тўғрисидаги қонун ҳужжатларида белгиланади.

Ш А Р Ҳ

1. Ички ишлар органлари Ўзбекистон Республикасининг 1992 йил
9 декабрдаги «Жазони ижро этиш муассасаларидан бўшатилган шахслар устидан ички ишлар органларининг маъмурий назорати тўғрисида»ги қонуни, Ўзбекистон Республикаси Ички ишлар вазирлигининг 2002 йил
26 февралдаги «Жазони ижро этиш муассасаларидан бўшатилган шахслар устидан ички ишлар идораларининг маъмурий назорати ҳақидаги йўриқномани тасдиқлаш тўғрисида»ги 51-сонли буйруғи ва бошқа қонун ҳужжатларида белгиланган тартибда илгари судланган шахсга нисбатан маъмурий назорат ўрнатиш (узайтириш) учун ҳужжатларни расмийлаштиради ҳамда тўпланган материалларни маъмурий назорат ўрнатиш (узайтириш) масаласини ҳал қилиш учун судга тақдим этади, шунингдек суднинг маъмурий назорат ўрнатиш (узайтириш) тўғрисидаги қарорига асосан маъмурий назоратини амалга оширади. Мазкур қонун ҳужжатларида маъмурий назоратни ўрнатиш, амалга ошириш ва тугатиш тартиби, шунингдек қўлланиладиган чекловлар рўйхати белгиланган.
«Жазони ижро этиш муассасаларидан бўшатилган шахслар устидан ички ишлар органларининг маъмурий назорати тўғрисида»ги қонуннинг 1-моддасида «Жазони ижро этиш муассасаларидан бўшатилган шахслар устидан ички ишлар идораларининг маъмурий назорати тарбиявий олдини олиш таъсир чораларининг мажмуини ифодалаб, назорат остидагиларга нисбатан ушбу Қонунда кўзда тутилган чеклашларни қўллашдан иборат бўлади», ‒ деб таъриф брилган.