Ўзбекистон Республикасининг «Ҳуқуқбузарликлар профилактикаси тўғрисида»

38-модда. Шахсни профилактик ҳисобга олиш муддати
Шахсни профилактик ҳисобга олиш у профилактик ҳисобга қўйилган пайтдан эътиборан бир йил мобайнида амалга оширилади.
Агар профилактик ҳисобга олишни амалга ошириш даврида ушбу Қонун 36-моддасининг биринчи қисмида назарда тутилган янги асослар вужудга келса, шахсни профилактик ҳисобга олиш муддатини ҳисоблаш шахс янги вужудга келган асослар бўйича профилактик ҳисобга қўйилган пайтдан эътиборан амалга оширилади.

Ш А Р Ҳ

1. Шахсни профилактик ҳисобга олиш у профилактик ҳисобга қўйилган пайтдан эътиборан бир йил мобайнида амалга оширилади.

Шахсни профилактик ҳисобга олинган деб топиш учун қуйидагилар тўлиқ бажарилган бўлиши лозим:
- шахсни профилактик ҳисобга олиш ҳақида асослантирилган қарор қабул қилинган бўлиши;
- шахсни профилактик ҳисобга олиш ҳақида қабул қилинган қарор ИИБ бошлиғи томонидан тасдиқланган бўлиши;
- ўзига нисбатан профилактик ҳисобга олиш тўғрисида қарор қабул қилинган шахсга қонунда белгиланган муддатда бу ҳақда эълон қилинган бўлиши.
Бироқ шахсни профилактик ҳисобга олиш муддати профилактик ҳисобга олиш ҳақида асослантирилган қарор қабул қилинган пайтдан ҳисобга олинади ва бир йил этиб белгиланади.
2. Агар шахс профилактик ҳисобга олинган «Ҳуқуқбузарликлар профилактикаси тўғрисида»ги қонуннинг 36-моддаси биринчи қисмида назарда тутилган янги асослар вужудга келса, шахсни профилактик ҳисобга олиш муддатини ҳисоблаш шахс янги вужудга келган асослар бўйича профилактик ҳисобга қўйилган пайтдан эътиборан амалга оширилади. Бунда, олиб борилган профилактик таъсир чораларига қарамасдан, ахлоқан тузалиш йўлига кирмаган профилактик ҳисобда турган шахс билан кўпроқ муддат якка тартибдаги профилактик таъсир кўрсатиш чораларини амалга ошириш мақсади кўзланади.
Профилактик ҳисоб ишларининг юритилиши ички ишлар органи бошлиғи, унинг профилактика хизматига раҳбарлик қилувчи ўринбосари, ҳуқуқбузарликлар профилактикаси бўлинмаси бошлиғи томонидан йилнинг ҳар чорагида камида бир марта текширилиб, аниқланган камчиликлар бартараф этиб борилади.